Хөлбөмбөгийн дэлхийн аваргын тоглолт А хэсгийн зохион байгуулагч Орос болон Азийн төлөөлөл Саудын Арабын шигшээ багуудын тоглолтоор эхэллээ. Тоглолт Москва хотын “Лужник” цэнгэлдэхэд болж 78 мянган хүн нээлтийн тоглолтыг үзсэн байна.

• Орос 5-0 Саудын Араб (гоол: Ю.Газинский 12’, Д.Черышев 43’, 90+1’, А.Зюба 71’, А.Головин 90+4’)

Орос: И.Акинфеев, М.Фернандес, И.Купетов, С.Игнашевич, Ю.Жирков, Ю.Газинский, Р.Зобнин, А.Самедов (Д.Кузяев 64’), А.Загоев (Д.Черышев 24’), А.Головин, Ф.Смолов (А.Зюба 70’)

Саудын Араб: Абдаллах аль-Майюф, Мухаммед аль-Бурайк, Осама Хавсави, Омар Отман, Ясир аш-Шахрани, Абдаллах Утаиф (Фахад аль-Муваллад 64’), Салем аль-Давсари, Салман аль-Фараж, Таисир аль-Жассим, Яхья аш-Шехри (Моханад Асери 85’), Мухаммед аль-Сахлави

Тус тоглолтын өмнө Оросын шигшээ багийг 5-0 харьцаатай ялалт байгуулна гэж таамагласан хүн хараахан байхгүй байсан болов уу? Учир нь дэлхийн аваргын өмнө Оросын шигшээ багийг “WORSE RUSSIA TEAM” хэмээн тодотгож байсан. Арга ч үгүй биз. Оросын шигшээ баг С.Черчесовын удирдлага дор өнгөрсөн оны Тив хоорондын цомын тэмцээнд хэсгээс гарч чадаагүй бөгөөд ганцхан Шинэ-Зеландын шигшээ багийг хожсон бол энэ он гарсаар нөхөрсөг тоглолтуудад 3 хожигдон 1 тэнцээд байсан.

Гэхдээ Оросын шигшээ баг ерөнхийлөгчийнхөө өмнө, олон мянган хөгжөөн дэмжигчдийнхээ өмнө хурдаар давамгайлсан Саудын Арабыг шигшээ багийг хэний ч санаанд оромгүй 5-0 харьцаатай буулгаж авснаар дэлхийн аваргын нээлтийн тоглолтыг ялалтаар эхлүүллээ. Тоглолтын эхний гоолыг Ю.Газинский 12 дахь минутанд мөргөж гоолдсноор тооны харьцааг нээсэн. Удалгүй 43 дахь минутанд сэлгээгээр талбайд орж ирсэн Д.Черышев багийнхаа ялалтыг баталгаажуулсан гоолыг оруулж 2-0 харьцаатай эхний үе өндөрлөсөн. Талбайн эздийн давамгайлал 2-р үед ч үргэлжилж мөн сэлгээгээр талбайд гарсан А.Зюба 71 дэх дэх минутанд гоол оруулсан бол шүүгчийн мэдлийн нэмэлт цагт Д.Черышев дахин нэг гоол оруулсан бол сүүлчийн гоолыг тус тоглолтонд шигшээ багийнхаа гол найруулгыг хийж байсан А.Головин гоол оруулснаар тоглолт өндөрлөсөн.

Нээлтийн тоглолт хэний ч санаанд оромгүй үр дүнгээр өндөрлөсөн бөгөөд тоглолтын дараа ОХУ-ын ерөнхийлөгч В.Путин шигшээ багийнхаа дасгалжуулагч руу утасдан баяр хүргэсэн ажээ. Мөн энэ тоглолтонд дэлхийн аваргын нээлтийн гоол оруулсан Ю.Газинский шигшээ багийнхаа төлөө анхны гоолыг оруулсан бол А.Загаевтай сэлгэгдэн талбайд гарсан Д.Черышев дэлхийн аваргын түүхэнд нээлтийн тоглолтонд сэлгээгээр талбайд гарч ирэн гоол оруулсан анхны тоглогч, дубль хийсэн мөн анхны тоглогч болсон байна.  

Б.БЯМБАБАЯР