2018 оны дэлхийн аварга шалгаруулах тэмцээн өнөөдөр Улаанбаатарын цагаар 23:00 цагаас ОХУ-ын нийслэл Москва хотын “Лужник” цэнгэлдэх хүрээлэнд эхэлнэ. Дэлхийн аваргын эхний тоглолт А хэсгийг тэргүүлж буй зохион байгуулагч Оросын шигшээ баг Арабын ертөнцийн төлөөлөл Саудын Арабын шигшээ багтай тоглоно. Хоёр баг өмнө нь ганцхан удаа буюу 1993 оны 10 сард нөхөрсөг тоглолт хийхэд Саудын Арабын шигшээ баг 4-2 харьцаатай ялалт байгуулж байжээ. Тэгвэл хоёр дахь удаагаа дэлхийн аваргын нээлтийн тоглолтод таарч байна.

Саудын Арабын шигшээ баг 2018 он гарсаар 9 тоглолт хийхдээ 3 хожиж, 1 тэнцсэн бол 5 удаа хожигдсон. Гэхдээ хожигдсон тоглолтууд нь Итали, Герман, Бельги зэрэг хүчтэй багууд байсныг онцлох хэрэгтэй. Харин тэдний өрсөлдөгч ОХУ-ын шигшээ баг бүх тоглолтыг оролцуулаад сүүлийн 10 тоглолтоос ердөө ганцхан хожил авсан бол 3 тэнцэж 6 удаа хожигдоод байна. Мэдээж Франц, Бразил, Аргентин болон Мексикийн шигшээ багуудад хожигдсон нь асуудлыг зөөлрүүлж болох юм. Ямартаа ч Оросын дасгалжуулагч С.Черчесов “муу шигшээ баг” гэсэн тодотголыг авч хаяхын төлөө дэлхийн аваргын нээлтийн тоглолтондоо оролцох гэж байна.

Боломжит гарааны бүрэлдэхүүн:

ОХУ: И.Акинфеев, М.Фернандес, Ф.Кудряшов, С.Игнашевич, Ю.Жирков, Р.Зобнин, Д.Кузяев, А.Загоев, А.Самедов, А.Головин, Ф.Смолов

Саудын Араб: А.аль-Майюф, О.Хавсави, У.Хавсави, Я.аль-Шахрани, М.аль-Брейк, А.Утаиф, С.аль-Фараж, Я,аш-Шехри, Т.аль-Жассим, С.аль-Давсари, Ф.аль-Муваллад

Б.БЯМБАБАЯР