Дөрвөн жилд нэг удаа болдог хөлбөмбөгийн Дэлхийн аварга шалгаруулах тэмцээн маргааш ОХУ-д эхэлнэ. 21 дэх удаагийн ДАШТ-д оролцож буй 32 багаас түрүүлэх магадлалтай багуудын дунд Аргентин, Португалийн шигшээ баг бичигдсээр байгаа. Гэхдээ уг хоёр багт өнөө цагийн дэлхийн шилдэг хөлбөмбөгч Лионел Месси, Криштиану Роналду нар бий.

Энэ жил 31 настай Аргентиний шигшээ багийн тоглогч Лионел Мессигийн хувьд сүүлийн дэлхийн аварга гэж байгаа ч тэр гэртээ “Алтан цом”-той харихыг хүсч байгаа. 2014 онд Бразилд болсон 20 дэх удаагийн ДАШТ-ээс Месси мөнгөн медальтай буцаж байсан юм. Лионел Месси одоо бүхнээ дайчлах л үлдсэн. Дэлхийн таван удаагийн шилдэг хөлбөмбөгчин Лионел Мессиг талбайд гарах бүрд “сүүлчийн дэлхийн аварга” гэх үг хурцалсаар байх нь дамжиггүй. Мэргэжлийн тамирчны замналдаа дэлхийн аварга ‘Алтан цом’-той үлдэхийн тулд тэр юу чаддагаа харуулах л үлдлээ. 

Харин “Хөлбөмбөгт боломжгүй зүйл гэж үгүй” хэмээн хэлж ард түмэндээ амлалтаа өгөөд ирсэн  Криштиану Роналду мөн л “Алтан цом”-той гэртээ харихыг хүсч буй.

Португалын шигшээ багийн ахлагч Роналду Орост ирэхийн өмнө ард түмэндээ дараах амлалтыг өгсөн юм. “Би та бүхэнд юу амлаж чадах вэ гэвэл түрүүлэх зорилготой оролцоно. Би аливаа зүйлд бодитой ханддаг. Бид түрүүлэх гол магадлалтай багуудын нэг биш. Гэхдээ хөлбөмбөгт боломжгүй зүйл гэж үгүй. Испанитай хийх эхний тоглолт маш чухал. Хэсгээсээ гарна гэдэг маш чухал. Тиймээс манай багийн залууст их том хариуцлага ирлээ” гэсэн юм.

Орост ирсэн цагаасаа эхлэн олон мянган фанатуудад боломж бага Лионел Месси, Криштиану Роналду нарыг хэрхэн цойлохыг харах л үлдлээ. Фанатуудын хувьд тэдний бэлтгэлийн талбайг хайж, цаашлаад холоос ч болов сэлфи хийх гэсэн хүсэлдээ хөтлөгдсөөр. Роналдугийн хэлдгээр “боломжгүй зүйл үгүй” гэдэг шиг фанатуудын хувьд ч “уулзахад боломжгүй зүйл үгүй” билээ.