Францын нийслэл Парис хотноо жүдо бөхийн дэлхийн аварга шалгаруулах тэмцээний хоёр дахь өдрийн барилдаан эхэллээ. Өнөөдөр эрэгтэйчүүдийн 73 кг, эмэгтэйчүүдийн 52, 57 кг-ын жингийн барилдаан болох хуваарьтай. Эдгээр жинд Монголын тамирчдаас Г.Одбаяр /73 кг/, С.Ням-Очир /73 кг/, М.Бундмаа /52 кг/, Б.Солонго /52 кг/, Т.Баттөгс /57 кг/, Д.Сумъяа /57 кг/ нарын зургаан бөх барилдах юм.

Эрэгтэйчүүдийн 73 кг-ын жинд нийт 90 бөх зодоглож байна. С.Ням-Очирын тухайд С хэсэгт сугалаа таарсан бөгөөд дөнгөж сая эхний барилдаанаа Босния-Герцогевиний бөх Митар Мрдичтэй хийж, цэвэр яллаа. Тэрбээр торгуулиар юүко үнэлгээ алдаад байсан ч барилдааны төгсгөл үед идэвхтэй байж, юүко үнэлгээ авч, улмаар 10 секунд дутуу байхад цэвэр яллаа. С.Ням-Очир дараагийн барилдаанаа Молдавын бөх Марсель Трудовтой хийнэ.

Мөн энэ жинд өрсөлдөж буй Г.Одбаяр А хэсэгт багтсан бөгөөд тэрбээр эхний тойрогт хийлж, хоёрдугаар тойргийн барилдаанд БНСУ-ын бөхтэй барилдах юм.