Олон улсын сагсан бөмбөгийн холбоо буюу FIBA-с зохион байгуулж буй 3х3 дэлхийн аварга шалгаруулах тэмцээн Филиппин улсын Манила хотод болж байна.

Эрэгтэйчүүдийн ангилалд шилдэг 20 баг оролцож байгаагаас Монгол Улсын шигшээ баг ОХУ, Бразил, Канад, Филиппиний багтай “С” хэсэгт багтсан юм.

Дэлхийн аварга шалгаруулах тэмцээний хоёр дахь өдөр буюу өчигдөр /2018.06.09/ Монгол Улсын баг Канад, Филиппиний багтай тоглож, анхны хожлоо авлаа.

50 мянган хүний суудалтай “Philippine Arena”-д манай залуус эхний тоглолтоо Канадтай хийж, 21:15 онооны харьцаагаар ялагдсан. Тэгвэл хоёр дахь тоглолт тэмцээнийг зохион байгуулагч Филиппин улсын баг байсан юм. Олон мянган хөгжөөн дэмжигчдийнх нь өмнө хожих хүндхэн даалгавартай гарсан Монгол Улсын баг хүчтэй өрсөлдөөнийг үзүүлж, 21:15 онооны харьцаагаар үндсэн цаг дуусахаас өмнө ялалтыг авлаа.

Тоглолт эхлээд эхний зургаан минут өнгөрөхөд талбайн эзэд 8:2-оор илүүрхэж байсан юм. Манай залуус довтолгоо болгон хамгаалалтыг сайн гүйцэтгэж, оноог ойртуулж чадсан. Цаг дуусахаас 1 минут 40 секундын өмнө шийдвэрлэх 21 дэх оноог авснаар ялалт байгууллаа. Энэ тоглолтод Г.Цэнгүүнбаярын холын зайн шидэлт олон удаа оновчтой болж байсан юм.

“С” хэсгийг Канад хоёр хожил авсан амжилтаар тэргүүлж эхэлсэн бол ОХУ, Монгол, Филиппин нэг хожилтойгоор удаалж байна. Харин Бразилын залуус өчигдрийн хоёр тоглолтоос хожил авч чадсангүй.

“С” хэсгийн сүүлийн тоглолтууд маргааш /2018.06.11/ болох бөгөөд Монгол-ОХУ, Монгол-Бразилын тоглолтын үр дүнгээс хамаарч хасагдах шатанд өрсөлдөх багууд тодорно.

С.Тулга дасгалжуулагчийн удирдлага дор оролцож буй Монгол Улсын шигшээ багийн бүрэлдэхүүнд Д.Дэлгэрням, Э.Дөлгөөн, Э.Цэрэнбаатар, Г.Цэнгүүнбаяр нар багтсан бөгөөд тэд ДАШТ-ийн түүхэн анхны хожлыг авлаа. Маргааш хоёр чухал тоглолт хүлээж байна. 

“Токио 2020” олимпийн наадамд багтсан 3х3 сагсан бөмбөгийн дүрмийн тухай талбайд 10 минут тоглох юм. Баг гурван тоглогчтой байх бөгөөд талбайд гурав нь тоглоно. 10 минутын хугацаанд түрүүлж 21 авсан баг хожлыг авна.

FIBA 3×3 ДАШТ-ий мэдээллийг http://www.fiba.basketball/3x3WC/2018/games сайтаас аваарай.