Унгар улсын Сомбатхей хотноо бөхийн чөлөөт барилдааны өсвөр үеийн дэлхийн аварга шалгаруулах тэмцээн өчигдөр эхэллээ. Тэмцээнд дэлхийн 50 орны 500 гаруй тамирчин чөлөөт бөхийн эрэгтэй, эмэгтэй болон сонгомол бөхийн төрөлд тус бүр 10 жингийн ангилалд өрсөлдөж байгаа юм. Монголын баг тамирчдын тухайд чөлөөт бөхийн эрэгтэй, эмэгтэй төрөлд бүрэн бүрэлдэхүүнээрээ оролцохоор бэлтгэлээ хангаад байсан ч тодорхой шалтгааны улмаас зарим тамирчид дэлхийн аваргад оролцох боломжгүй болсон байна.

Өсвөрийн дэлхийн аварга шалгаруулах тэмцээний эхний өдөр буюу өчигдөр чөлөөт бөхийн эрэгтэйчүүдийн 42, 50, 58, 69 болон 85 кг-ын жингийн барилдаан болж, аваргууд тодорсон бол өнөөдөр эрэгтэйчүүдийн чөлөөт бөхийн үлдсэн жин болох 46, 54, 63, 76, 100 жинд медалийн эзэд тодрох учиртай. Өчигдөр болсон барилдаанд Монголын тамирчдаас Х.Хишигбат /42 кг/, Н.Билгүүн /58 кг/, Г.Төрболд /69 кг/, Э.Төгөлдөр /85 кг/ нарын дөрвөн бөх дэлхийн аваргын дэвжээнд хүч үзсэн ч медалийн тавцанд гарч чадсангүй.

Монголын баг тамирчдаас өчигдөр 42 кг-ын жинд Х.Хишигбат зодоглож, эхний тойрогт хийлж, хоёрдугаар тойргийн барилдаанд Канадын бөх Жордан Ричард Рагунандахыг 10:0, 4:0 харьцаатай ялсан ч удаахь барилдаандаа Энэтхэгийн бөх Рам Канвар Мангал Кадиянд 5:1, 2:0 оноогоор ялагдсанаар тэмцээнээ дуусгажээ. Мөн 50 кг-ын жинд барилдсан Ө.Бямбацогт эхний тойргийн барилдааныг өнжиж, хоёрдугаар тойрогт Армяны Нарек Бабаянд 0:2, 1:0, 4:1 харьцаатай дийлдсэн бол 69 кг-д Г.Төрболд мөн л эхний тойрогт хийлсэн ч хоёрдугаар тойргийн барилдаанд АНУ-ын Оливер Пирст 5:1, 3:1 харьцаатай ялагдсан байна. Харин 85 кг-д барилдсан Э.Төгөлдөр эхний барилдаандаа Узбекистаны тамирчин Шавкатьон Одинаевт 6:0, 4:0 оноогоор дийлдэж, дэлхийн аваргыг орхижээ.

Харин өнөөдөр Монголын баг тамирчдаас 46 кг-д З.Занабазар, 54 кг-д Г.Бэгзжав, 63 кг-ын жинд Э.Мөнх-Эрдэнэ, 76 кг-д Б.Нямбаяр нар хүч үзнэ.

Тэмцээний хуваарийн дагуу 25, 26-нд эмэгтэйчүүдийн чөлөөт бөхийн барилдаан болж, тэмцээний сүүлийн хоёр өдөр буюу 27, 28-нд сонгомол бөхийн барилдаан болно.