“Орос-2018” хөлбөмбөгийн ДАШТ эхлэхэд 10 хоног үлдлээ. Мэдээллийн NEWS агентлаг ДАШТ-нд оролцох 32 улсын шигшээ багийн танилцуулгыг цувралаар хүргэж байгаа билээ. Энэ удаа Африк тивийн төлөөлөл Египетийн шигшээ багийг танилцуулж байна.

• Дасгалжуулагч: Эктор Купер

• Шигшээ багийн ахлагч: Эссам альХадари

• Шигшээ багтайгаа хамгийн олон тоглосон: Ахмед Хассан 184 тоглолт

• Шигшээ багийнхаа төлөө хамгийн олон гоол оруулсан: Хоссам Хассан 70 гоол

• ФИФАн чансаа: 2018 оны 5 сарын байдлаар 46

• ДАШТнд оролцсон байдал: 1934, 1990 онд оролцож байсан

• ДАШТнд үзүүлсэн амжилт: хэсгийн шатанд өрсөлдсөн

Орос хүрэх замд:

Африкийн цомын 7 удаагийн аварга Египетүүд 28 жилийн дараа дэлхийн аваргад оролцох гэж байна. Египетийн шигшээ баг Оросод болох дэлхийн аваргад оролцохын тулд эхний шатандаа Чадын шигшээ багтай тоглож хоёр тоглолтын нийлбэр дүнгээр 4-1 харьцаатай хожиж 3-р шатанд шалгарсан. Ингээд Африкийн бүсийн 3-р шатанд Уганда, Гана, Конгогийн шигшээ багуудтай өрсөлдөж 6 тоглолт хийхдээ 4 хожин хэсгээ тэргүүлж дэлхийн аваргын эрхээ авсан.

Шигшээ багийн бүрэлдэхүүн:

Аргентин мэргэжилтэн урьдчилсан байдлаар 29 тамирчинг шигшээ багтаа дуудаад байгаа. Өнөөдөр буюу 6 сарын 4-нд албан ёсны 23 тамирчнаа зарлах ёстой. Эдгээр тоглогчдоос 6 тамирчин гэртээ үлдэж бусад нь Оросыг зорино.

• Хаалгач: Эссам аль-Хадари (Саудын Арабын Аль-Таавун), Шериф Экрами, Мохамед эль-Шенави (хоюулаа Египетийн Аль-Ахли), Мохамед Авад (Египетийн Исмаили)

• Хамгаалагч: Ахмед Фатхи, Саад Самир, Аяман Ашраф (бүгд Египетийн Аль-Ахли), Ахмед Элмохамаду (Английн Астон Вилла), Мохамед Абдель-Шафи (Саудын Арабын Аль-Фатех), Ахмед Хегази, Али Габр (хоюулаа Английн Вест Бромич Альбион), Карим Хафез (Францын Ланс), О.Габер (АНУ-ын Лос-Анжелес Галакси), Амро Тарек (АНУ-ын Орландо Сити), Эль-Винш (Египетийн Замалек)

• Хагас хамгаалагч: Мохамед Эль-Нени (Английн Арсенал), Рамадан Соби (Английн Стоук Сити), Сэм Морси (Английн Уиган Атлетик), Абдаллах Саид (Финландын КуПС), Шикабала (Саудын Арабын Аль-Раед), Хассан Трезеге (Туркийн Касымпаша), Тарек Хамед, Махмуд Абдель-Азиз (хоюулаа Египетийн Замалек), Кахраба (Саудын Арабын Аль-Иттихад), Амр Варда (Грекийн Атромитос)

• Довтлогч: М.Салах (Английн Ливерпүүл), Ахмед Хассан (Португалын Брага), Марван Мохсен (Египетийн Аль-Ахли), Ахмед Гомаа (Египетийн Аль-Масри)

ДАШТ-ний хэсэг:

Египетийн шигшээ баг ДАШТ-ний А хэсэгт зохион байгуулагч Орос, Уругвай, Саудын Арабын шигшээ багуудтай багтсан. Хэсгийн эхний тоглолт нь Өмнөд Америкийн төлөөлөл Уругвай улсын шигшээ байх юм. Египетийн шигшээ баг дэлхийн аваргад 2 удаа оролцохдоо хожил авч үзээгүй байна. Энэ удаа Уругвайн шигшээ багийг эс тооцвол бусад хоёр өрсөлдөгчөө буулгаж авч дэлхийн аваргын анхны хожлоо байгуулж, цаашлаад хэсгээс гарах ч боломжтой.

Түлхүүр тоглогч:

Английн Ливерпүүл клубын довтлогч “Египет Месси” М.Салах Египетийн шигшээ багийг дэлхийн аваргад орох боломжийг нээж өгсөн тоглогч юм. Түүний гавъяаг Египетийн ард түмэн маш өндрөөр үнэлэн магтан сайшааж байгаа. Гэхдээ түүнд өнгөрсөн аваргуудын лигийн шигшээ тоглолтонд авсан мөрний гэмтэл нь хэсгийн эхний тоглолтыг өнжихөд хүргэж магадгүй байна.

Б.БЯМБАБАЯР