Дэлхийн оюутны спортын “Универсиад” наадмын түүхэнд рекорд тогтоож, хамгийн том, хамгийн нүсэр бүрэлдэхүүнтэй үргэлжилсэн Шенжений наадам өчигдөр хөшгөө хаалаа. Хонконгтой хөршлөн орших тус хотод 12 хоногийн турш үргэлжилсэн "Универсиад” наадамд зохион байгуулагч орон болох Хятадын баг тамирчид 75 алтан медаль хүртэж, шинэ түүхийн эзэд болсноор медалийн чансаагаар тэргүүн эгнээнд бичигдсэн юм.

“Универсиад”-ын түүхэнд анх удаа 10 мянга давсан оролцогчид оролцсоноороо онцлогтой энэ жилийн наадмыг Олон улсын оюутны спортын холбоо /FISU/-ны шинэ ерөнхийлөгч Клод-Льюис Галльен “хамгийн шилдэг нь” хэмээн тодотгосон. “Универсиад” наадмын туршид 152 орноос 65 нь медаль хүртсэнээс Хятадын баг тамирчид нийт 145 медаль зүүсний 75 нь аваргын алтан медаль байлаа. Харин ОХУ-ын 132, үүнээс 42 алтан медаль хүртсэнээр удаахь байрт бичигдсэн юм. Монголын баг тамирчдын тухайд спортын 12 төрөлд 157 тамирчны бүрэлдэхүүнтэй оролцсоноос жүдо бөхийн эрэгтэйчүүдийн 60 кг-д О.Чинбат, буудлага спортын эрэгтэйчүүдийн багийн урт бууны 50 м-ийн хэвтээ байрлалаас буудах 60 сумны төрөлд, мөн буудлага спортын эмэгтэйчүүдийн урт бууны гурван дасгалд буудах төрөлд Ч.Нарантуяа, шатрын эмэгтэйчүүдийн ганцаарчилсан төрөлд Б.Мөнгөнтуул нар тус тус мөнгөн медаль хүртэж, нийт дөрвөн мөнгөн медаль хүртсэн амжилтаар медалийн чансаагаар 44 дүгээрт, медалийн тоогоор 33 дугаар байрт бичигдлээ.

“Универсиад” наадмын үеэр спортын 24 төрөлд 306 багц медалийг тамирчдад гардуулсан. Харин анхны алтан медалийг Италийн усан спортын тамирчин Симоне Руффини хүртсэн бол хамгийн сүүлийн алтан медаль Өмнөд Солонгосын Пак Ён-Хьюны энгэрт гялалзсан. Харин ОХУ-ын гимнастикч бүсгүй Евгения Канаева спорт гимнастикийн төрөлд дөрвөн алтан медалийн эзэн болсноор медальтнуудыг чансаагаар тэргүүлсэн юм. Мөн “Универсиад” наадмын үеэр Хятадын тамирчид болох Дин Фен, Жоу Жигуо, Ли Юүехун нар эрэгтэйчүүдийн багийн 25 метрийн гар бууны төрөлд нийлбэр 1759 оноо авснаар дэлхийн дээд амжилтыг шинэчлэн тогтоосон билээ. Харин “Универсиад”-ын түүхэн дээд амжилтыг 14 удаа шинэчлэн тогтоосноос долоо нь усан спортын төрөлд, зургаа нь дугуйн спорт, харин үлдсэн нэг нь байт харвааны төрөлд ажээ.

Энэ удаагийн “Универсиад” наадмын хөтөлбөрт шинээр шатар, аэробик, хүндийг өргөлт, гольф, элсний волейбол зэрэг спортын төрлүүд шинээр багтсан нь оролцогчдын тоонд нөлөөлсөн. Гэхдээ наадмын төгсгөлд нэг ч тамирчнаас допинг илрээгүйд зохион байгуулагчид сэтгэл хангалуун байгаагаа илэрхийлж байв.

“Универсиад” наадмын хаалтын ёслолын ажиллагаа Шенжень хотын жуулчдын хөл үл тасрах “Ертөнцийн цонх” цэнгэлдэхэд өчигдөр болсон. Хаалтын ёслолын ажиллагааны үеэр буюу өчигдөр 21.00 цагийн орчимд Шенжений “Универсиад” наадмыг зохион байгуулах хорооны тэргүүн Сью Цинь ОУОСХ-ны тугийг ОХУ-ын Казань хотын мэр Илсур Метшинд хүлээлгэн өгсөн юм. Дараагийн зуны “Универсиад” наадам 2013 онд Казань хотноо болно.

Гэрэл зургийг ЭНД дарж үзнэ үү.