Энэ жил Монгол улсад Залуучуудын хөдөлгөөн үүсч, хөгжсөний 90 жилийн ой тохиож байгаа билээ. Тус ойн хүрээнд Монголын залуучуудын алдар гавьяаны он дарааллын бичиг болсон “Залуучуудын үнэн” сониноо ууган нэрээр нь сэргээн гаргахаар Монголын Залуучуудын Холбооноос энэ оны эхээр шийдвэрлэсний дагуу сар бүрийн эхний долоо хоногт уншигчдад хүрч эхлээд найман сарыг ардаа орхиод байна. Залуучуудын хөдөлгөөн үүссэний 90 жилийн ойд зориулсан “Баярын дугаар” удахгүй хэвлэгдэн гарах гэнэ.  

Анх 1924 оны дөрөвдүгээр дүгээр сарын 24-нд мэндчилсэн Монголын залуучуудын ууган хэвлэл  “Залуучууд үнэн” сонин маань зах зээлийн шуурганд нэрвэгдэн XXI зууны босгыг алхаж чадалгүй түр саатсан хэдий ч 80 шахам жилийн турш замнаж ирсэн түүхэн замналаа XXI зууны эхэнд үргэлжлүүлэх боломжтой болсон юм. “Залуучуудын үнэн” сонин анхны дугаараасаа эхлэн ардын хувьсгалын ялалтыг бэхжүүлэх, залуучуудын шинэ хөдөлгөөнийг олон нийтэд ойлгуулж сурталчлахаас эхлэн, эвлэлийн эгнээг өргөтгөх, үндэсний шинэ соёлыг бадруулахад үнэлж баршгүй хувь нэмэр оруулсан билээ.