Дэлхийн олон театрт “Цасангоо ба долоон одой” балетыг тоглодог. Тэгвэл энэхүү алдарт балетыг “Номадик балет” продакшны уран бүтээлчид өнөөдөр ‘Улаанбаатар’ чуулгын танхимд хүүхэд багачууддаа тоглохоор бэлтгэжээ. 

“Номадик балет” продакшныхан энэ удаа хөгжмийн зохиолч Б.Павловскийн хувилбараар тоглох юм. Хоёр бүлэг, таван үзэгдэлт эл бүжгэн жүжгийн найруулагчаар Г.Батчимэг, тайзны зураачаар Б.Алтансүх, хувцасны загвар зохион бүтээгчээр Я.Цэцэгдорж ажиллаж байна.

Хорон санаат хатан хаанд балетын гоцлооч Э.Номин-Эрдэнэ, үзэсгэлэнт Цасангоод Б.Саруул, ханхүүд А.Эрдэнэболд, хатан хааны туршуул, элч хэрээнд Э.Эрдэнэжаргал нар бүжиглэнэ.

Хүүхэд бүрийн мэддэг дэлхийн хамгийн алдартай үлгэрүүдийн нэг болох “Цасангоо ба долоон одой”-г ах, дүү Гримм 1812 онд зохиосон гэдэг. Энэхүү бүтээл дэлхийн 100 хэлнээ орчуулагдан тайз, дэлгэцийн олон арван бүтээлүүдийн нэг болон үлджээ. 1937 онд ‘Уолт Дисней’ студийн таван жилийн турш хөдөлмөрлөж бүтээсэн ‘Цасангоо ба долоон одой’ нэртэй бүрэн хэмжээний, хөгжимт хүүхэлдэйн кино гарч хүүхэд багачууд төдийгүй насанд хүрэгчдийн хайртай дүрүүдийн нэг болон үлджээ. 

“Номадик балет” продакшны уран бүтээлчид “Цасангоо ба долоон одой” балетыг 2016 оны арвваннэгдүгээр сард анх тайзнаа тоглож, Монголын сонгодог урлагийн хөгжилд нэгэн шинэ хуудсыг нээж байсан. Тэгвэл энэхүү балетыг өнөөдөр “Улаанбаатар” чуулгын танхимд  11:00, 14:00, 16:00 цагуудаас гурван удаа тоглоно. 

Хүүхдийн баярын өдрөөр “Цасангоо ба долоон одой”-той уулзаарай.