Хойд Америкийн Үндэсний Хоккейн Лиг (NHL)-н стэнлийн цомын төлөөх цувралын 2 дахь тоглолт боллоо. Цувралыг талбай дээрээ эхлүүлж буй Вегас Голден Найтс эхний тоглолтонд хожил байгуулаад байсан бол өнөө өглөө болсон цувралын 2 дахь тоглолтонд 2-3 харьцаатай хожигдсон байна.

Хоёр багийн тоглолтын 1-р үед талбайн эздээс Ж.Нейл эхний гоолыг оруулж Вегас Голден Найтс тэргүүлж эхэлсэн. Гэвч түүний гоолоос 10 мин-н дараа Вашингтон Капиталс багийн Дани залуу Л.Эллер плэй-оффын 6 дахь гоолоо оруулж тооны харьцааг тэнцүүлсэн. Ингээд тоглолтын 1-р үед тооны харьцаа тэнцээгээр өндөрлөсөн бол 2-р үед зочин багаас А.Овечкин, Б.Орпик нар тус бүр 1 гоол оруулсан бол талбайн эздээс Ш.Теодоре багийнхаа 2 дахь гоолыг оруулсан.Тус тоглолтонд Вашингтон Капиталс багаас Л.Эллер 1 гоол, 2 гоолын дамжуулалт өгсөн бол, А.Бураковский 2 гоолын дамжуулалт өгчээ. Ийнхүү зочин баг Вашингтон Капиталс баг талбайн эздийг хөгжөөн дэмжигчдийнх нь өмнө 3-2 харьцаатай хожсноор цувралыг 1-1 болгон тэнцүүллээ. Дараагийн хоёр тоглолт Вашингтон Капиталс багийн талбайд болно.

Б.БЯМБАБАЯР