Монголбанк энэ оны эхний долоон сарын байдлаар арилжааны банкууд дахь иргэдийн хадгаламжийн нийт дүнг гаргасан байна. Энэ оны долдугаар сарын байдлаар гурван их наяд, 238 тэрбум төгрөгийн хадгаламжийг арилжааны банкуудад байршуулжээ. Үүнээс хугацаатай хадгаламж дийлэнх хувийг буюу нэг их наяд 512,3 тэрбум төгрөгийн, 301,01 сая валютын хадгаламж эзэлж байна. Харин хугацаагүй хадгаламжид 798,7 тэрбум төгрөгийн, 282,6 сая валютын хөрөнгө байна.

Иргэдийн хадгаламжийн хэмжээг өнгөрсөн оны мөн үетэй харьцуулахад нэг их наяд орчим төгрөгөөр нэмэгдсэн байна. Өнгөрсөн оны долдугаар сард арилжааны банкуудад иргэдийн хоёр их наяд 135,2 тэрбум төгрөгийн хадгаламж байршиж байжээ.