Хойд Америкийн Үндэсний Хоккейн Лиг (NHK)-ийн 2017-2018 оны стэнлийн цомын төлөөх тоглолт эхэллээ. Өрнөд бүсийн аварга Вегас Голден Найтс багийн талбайд Дорнод бүсийн аварга Вашингтон Капиталс баг зочлон цувралын эхний тоглолтоо хийсэн. Тус тоглолтонд талбайн эзэн Вегас Голден Найтс 6-4 харьцаатай өрсөлдөгчөө буулгаж авсан байна.

Тоглолт маш нээлттэй, довтолгоо зонхилж байсан бөгөөд тоглолтын 1-р үед хоёр багаас тус бүр 2 гоол орсон бол 2-р үед 1:1 гоол орсон. Ингээд шийдвэрлэх 3-р үе эхлэхэд зочин багийн Т.Уильсон багтаа тэргүүллийг авчирсан гоолыг оруулсан. Гэвч энэ нь зочин баг Вашингтон Капиталс багийн сүүлийн гоол байсан бөгөөд талбайн эздээс Р.Рейвес тэнцээний гоол оруулсан бол Т.Носек 2 гоол оруулснаар талбайн эзэд ялалт байгуулсан. Ийнхүү NHL-н шинэ цэрэг Вегас Голден Найтс баг стэнлийн цомын төлөөх финалын цувралын эхний шатанд ялалт байгуулж байна.

Б.БЯМБАБАЯР