• Дасгалжуулагч: Оскар Рамирес
• Шигшээ багийн ахлагч: Брайн Руис
• Шигшээ багтаа хамгийн олон тоглосон: Вальтер Сентено 137 тоглолт
• Шигшээ багийнхаа төлөө хамгийн олон гоол оруулсан: Роландо Фонсека 47 гоол
• ФИФА-н чансаа: 2018 оны 5 сарын байдлаар 25
• ДАШТ-нд оролцсон байдал: 1990, 2002, 2006, 2014 онд оролцсон
• ДАШТ-нд үзүүлсэн амжилт: 2014 онд шөвгийн 8-д шалгарсан

МОСКВА ХҮРЭХ ЗАМД:

Төв Америкт орших Коста-Рика улсын шигшээ баг бүсээсээ Мексикийн араас 2-рт гарч дэлхийн аваргад оролцох эрхээ авсан. Хойд Америк болон Төв Америк, Карибын орнуудын бүс нь нийтдээ 5 үе шаттай сорилго хийсэн. Коста-Рикагийн шигшээ баг 4-р шатнаас өрсөлдөөнд орохдоо В хэсэгт Панам, Ямайка болон Гайти улсуудтай багтан хэсэг тэргүүлж 5-р шатны өрсөлдөөнд шалгарсан. Бүсийнхээ шилдэг 6 багийн өрсөлдөөнд 10 тоглолт хийхдээ Панам болон Мексикийн шигшээ багуудад тус бүрт нь нэг хожигдож 4 хожил, 4 тэнцээ авснаар 16 оноо авсан. Ийнхүү Коста-Рикагийн шигшээ баг дэлхийн аваргад оролцох ээлжит эрхээ авсан юм.

ШИГШЭЭ БАГИЙН БҮРЭЛДЭХҮҮН:

О.Рамирес шигшээ багийнхаа бүрэлдэхүүнийг 23 тамирчинтай өнгөрсөн 15-нд зарласан. Эдгээр хөлбөмбөгчдийн дунд К.Навас тэргүүтэй Европын лигт тоглодог хэд хэдэн тоглогчид багтсан байгаа.

Хаалгач: К.Навас (Испаний Реал Мадрид), П.Пембертон (Алахуэленсэ), Л.Морейра (Эредиано)

Хамгаалагч: Ж.Гонсалес (Италийн Болонья), Б.Овьеда (Английн Сандерлэнд), О.Дуарте (Испаний Эсваньол), К.Гамбоа (Шотландын Селтик), Я.Смит (Шведийн Норрчёпинг), Ж.Акоста (Колумбын Рионегро Агилас), Ф.Кальво (АНУ-ын Миннесота Юнайтед), Р.Матаррита (АНУ-ын Нью-Йорк Сити), К.Уостон (Канадын Ванкувер Уайткэпс)

Хагас хамгаалагч: С.Борхес (Испаний Депортиво), Е.Техеда (Швейцарын Лозанна), Д.Гусман (АНУ-ын Портленд Тимберс), Р.Уоллас (АНУ-ын Нью-Йорк Сити), К.Боланьос, Д.Колиндерс (хоюулаа Депортиво Саприса), Р.Асофейфа (Эредиано)

Довтлогч: Б.Руис (Португалын Спортинг), Х.Кэмпбелл (Испаний Реал Бетис), М.Уренья (АНУ-ын Лос-Анжелес), Й.Венегас (Депортиво Саприсса)

ДАШТ-НИЙ ХЭСЭГ:

Коста-Рика улсын шигшээ баг ДАШТ-ний Е хэсэгт Бразил, Серби болон Швейцарын шигшээ багуудтай хамт нэг хэсэгт багтсан. Нээлтийн тоглолтоо Европын төлөөлөл Сербийн шигшээ багтай хийнэ. 4 жилийн өмнө Итали, Англи болон Уругвайн шигшээ багуудыг ардаа орхин хэсгээсээ ганц ч хожигдолгүй 1-р гарч хасагдах шатанд шалгарч байсан. Энэ жилийн ДАШТ-нд Бразилыг эс тооцвол хэсгээс гарах боломж харагдаж байна.

ТҮЛХҮҮР ТОГЛОГЧ:

Мэдээж хаалгач К.Навас Коста-Рикагийн шигшээ баг хамгийн чухал тоглогч юм. Өдгөө 31 настай хаалгач К.Навас 2014 оны ДАШТ-ний дараа дэлхийн шилдэг клубуудын анхаарлын төвд орж удалгүй Реал Мадрид клубт ирж байсан. Тэр цагаас хойш өөрийгөө дэлхий нийтэд шилдэг хаалгач гэдгээ батлан харуулж байна. Мөн тэр 4 жилийн өмнө шигшээ багаа дэлхийн аваргын дунд шөвөгт шалгарахад гол ачааг нуруундаа үүрч байсан.

Б.БЯМБАБАЯР