Европын хөлбөмбөгийн клубуудын хамгийн нэр хүндтэй тэмцээн болох аваргуудын лигийн 2017-2018 оны шигшээ тоглолт өнөө шөнө Улаанбаатарын цагаар 02:45 цагт болно. Энэ удаагийн шигшээ тоглолтод аваргуудын лигийн 12 удаагийн аварга Испанийн Реал Мадрид клуб болон таван удаагийн аварга Английн Ливерпүүл клубууд шалгараад байгаа билээ.

Реал Мадрид клуб өмнө нь 15 удаа шигшээд шалгарахдаа 12 удаад нь аваргуудын лигийн дэлдэн чихт цомыг өргөсөн бөгөөд сүүлийн  хоёр жил дараалан түрүүлээд байгаа билээ. Харин тэдний өрсөлдөгч Ливерпүүл клуб долоон удаа аваргуудын лигийн финалд шалгарахдаа таван удаад нь түрүүлж байжээ. Хоёр баг өмнө нь нийт таван удаа аваргуудын лигийн дэвжээн дээр таарч тоглоход Ливерпүүл клуб гурав хожсон бол Реал Мадрид клуб хоёр хожсон байдаг. Одоо хоёр баг зургаа дахь удаагаа аваргуудын лигийн хүрээнд тоглох гэж байна.

• 1980-1981 оны аваргуудын лигийн финалд шалгарахад Ливерпүүл клуб А.Кеннедигийн 82 дахь минутанд оруулсан гоолоор Реал Мадрид клубыг хожиж цомыг хүртэж байсан.
• 2008-2009 онд шөвгийн 16-д таарахад С.Жеррард, Ф.Торрес, А.Доссена болон Й.Бенаюн нарын гоолоор хоёр тоглолтын нийлбэр дүнгээр Ливерпүүл клуб 5-0 харьцаатай хожсон.
• 2014-2015 оны хэсгийн шатанд К.Роналдо, К.Бензема нарын гоолоор хоёр тоглолтын нийлбэр дүнгээр Реал Мадрид 3-0 харьцаатай хожсон

-Реал Мадрид клуб аваргуудын лигийн Н хэсэгт Боруссиа Дортманд, Тоттенхэм Хотспур болон АПОЭЛ клубуудтэй багтаж хоёрдугаар хасагдах шатанд шалгарсан. Хасагдах шатанд эхлээд ПСЖ клубыг нийлбэр 5-2, дунд шөвөгт Ювентус клубыг нийлбэр 4-3, хагас шигшээд Бавари Мюнхен клубыг нийлбэр 4-3 харьцаатай хожиж шигшээд шалгараад байна.

-Ливерпүүл клуб аваргуудын лигийн плэй-оффын тоглолтоо Хоффенхайм клубтэй хийж нийлбэр 6-3 харьцаатай хожиж эрхээ авсан. Ингээд Е хэсэгт Севилья, Спартак Москва болон Марибор багуудтай багтаж ганц ч хожигдолгүй хэсгээ тэргүүлж хасагдах шатанд шалгарсан. Улмаар шөвгийн 16-д Портог нийлбэр 5-0, дунд шөвөгт Манчестер Ситиг нийлбэр 5-1, хагас шигшээд Рома клубыг нийлбэр 7-6 харьцаатай хожиж шигшээд шалгараад байна.

Таамаглаж буй гарааны бүрэлдэхүүн:

Реал Мадрид: К.Навас, Д.Карвахаль, Р.Варан, С.Рамос, Марсело, Л.Модрич, Каземиро, Т.Кроос, Иско, К.Роналдо, К.Бензема. Бэртэлтэй тоглогч байхгүй.

Ливерпүүл: Л.Кариус, Т.Александр-Арнольд, В.ван Дейк, Д.Ловрен, А.Робертсон, Ж.Милнер, Ж.Хендерсон, Ж.Вейналдум, С.Манэ, Р.Фирминьо, М.Салах. Бэртэлтэй тамирчид нь А.Оклейд-Чемберлен, Ж.Гомес, Ж.Матип, Э.Жан

Б.БЯМБАБАЯР