Бүх насныханд зориулагдсан Монгол хэлний зөв бичих дүрмийн “Монгол боловсрол” ном хэвлэлтээс гарчээ. Тус номын нээлт наймдугаар сарын 28-нд 11.00 цагт Сүхбаатарын талбайд болох бөгөөд энэ өдөр уншигчид тус номыг 60 хувийн хямдралтай худалдан авах боломжтой гэнэ.

Монгол хэлний зөв бичих дүрмийг төгс эзэмшихэд нэлээд хүндрэл тохиолддог. Ялангуяа багачууд хүүхдүүдэд дүрэм тогтоолгох гэж эцэг эх, багш нар нь хүндрэлтэй тулгардаг нь нууц биш. Хамгийн гол нь хүүхдийн ой тогтоолтод жишээ тун чухал байдаг гэнэ. Жишээ нь нүдний тогтоох ойгоор дамжуулан уг дүрмийг хүүхдийн тархинд суулгаж өгдөг сайн талтай. Үүнд тохирохоор дүрэм бүхнээ жишээгээр тайлбарласан уг ном уншигчдын гар дээр очиход бэлэн болжээ. “Монгол боловсрол” нэртэй энэхүү сурах бичиг нүдлэн тогтооход хэрэг болдог богино хэмжээний шүлэг, өгүүллэгээр дүрмийг тайлбарлан бичсэн бөгөөд бичсэн шүлгээс санаа авч, санаанаас үгээ тогтоож, тогтоосон үгнээс дүрмээ тогтоохоор уялдуулж хийснээрээ энэхүү ном давуу талтай аж. Номонд орсон өгүүллэг, эссэ зэрэг өгүүлэмж ёс заншил, амьдралд тохиолдох элдэв зүйлийг шингээж өгснөөрөө онцлог болжээ.