Германы хөлбөмбөгийн цомын аварга шалгаруулах тэмцээн буюу DFB Pokal цомын төлөөх шигшээ тоглолт урьд шөнө боллоо. Тус тоглолтонд алдарт Бавари Мюнхен болон Айнтрахт Франкфурт багууд шалгараад байсан юм. Шигшээ тоглолт Берлин хотын Олимпийн цэнгэлдэх хүрээлэнд болж санаанд оромгүй үр дүнгээр өндөрлөж Айнтрахт Франкфурт клуб цомын эзэн болжээ.

Айнтрахт Франкфурт багаас Хорват довтлогч А.Ребич дубль хийсэн бол сэлгээнээс талбайд орж ирсэн М.Гачинович мөн нэг гоол оруулсан бол Бавари Мюнхен клубээс Р.Левандовский тоглолтын 55 дахь минутанд ганц гоол оруулсан байна. Ийнхүү тоглолтын үндсэн цаг өндөрлөхөд Айнтрахт Франкфурт клуб 3-1 харьцаатай ялалт байгуулж 30 жилийн дараа Германы цомын аварга шалгаруулах тэмцээнд түрүүллээ.

Айнтрахт Франкфурт клубын хувьд хамгийн сүүлд 1988 онд Германы цомын аваргад түрүүлж байсан бол Германы лигт 1959 онд ганц удаа түрүүлж байжээ.

Б.БЯМБАБАЯР