“Универсиад”-аас дөрөв дэх медалиа хүртлээ

Хуучирсан мэдээ: 2011.08.23-нд нийтлэгдсэн

“Универсиад”-аас дөрөв дэх медалиа хүртлээ

Энэ сарын 12-нд нээлтээ хийсэн дэлхийн оюутны спортын зуны 26 дугаар “Универсиад” их наадам БНХАУ-ын Шенжень хотноо өнөөдөр өндөрлөнө. Спортын уралдаан, тэмцээн өндөрлөх дөхсөн энэ үед Монголын тамирчид дөрвөн мөнгөн медаль хүртээд байна. Өмнө нь жүдо, буудлага болон шатрын спортын төрөлд тус тус мөнгөн медаль хүртээд байсан бол буудлага спортын тамирчин Ч.Нарантуяа Монголын баг тамирчдын медалийн тоог нэгээр нэмж, эмэгтэйчүүдийн урт бууны гурван дасгалд буудах төрөлд мөнгөн медаль хүртжээ. Энэ төрөлд Чехийн тамирчин А. Секерова түрүүлж, Унгарын К.Верес хүрэл медалийн эзэн болжээ. Буудлагын спортын төрөлд багийн дүнгээр нийт 22 медальтайгаар БНХАУ тэргүүн байрт шалгарсан бол Италийн тамирчид дөрвөн алтан медальтайгаар хоёрдугаар байрт, БНСУ-ын баг тамирчид нийт найман медаль хүртсэн амжилтаар гуравдугаар байрт шалгарчээ.  Харин манай улсын баг хоёр мөнгөн медальтайгаар наймдугаар байрт шалгарсан юм. 

Наадмын сүүлчийн өдөр буюу өнөөдөр Монголын баг тамирчдаас таэквондогийн төрөлд Б.Туяасайхан оролцоно.

“Универсиад”-ын хаалтын ажиллагаа өнөөдөр 20.00 цагт “Дэлхийн цонх” спортын цогцолборт болох юм. Тус наадамд дэлхийн 151 орны 10600 гаруй төлөөлөгчид оролцсон нь өмнөх зуны “Универсиад” наадмуудын оролцогчдын тоотой харьцуулахад дээд амжилт тогтоогоод байна.    

Монголын оюутны спортын холбоо

Ж.Энхнаран Шенжень хотоос мэдээлэв
NewsMN Гар утасны хувилбар Татах
NEWS.mn

Мэдээллийн эх сурвалж