Монголын Мянганы сорилтын сангийн (ММСС) Мэргэжлийн боловсрол, сургалтын төслийн хүрээнд Мэргэжлийн сургалт үйлдвэрлэлийн төвийн багш нарыг хамруулсан “Техникийн Англи Хэлний Эрчимжүүлсэн Сургалт”-ын хаалтын арга хэмжээ 2011 оны 8 дугаар сарын 22-ны өдөр явагдлаа. Тус сургалтыг  Америк – Монголын хамтарсан Сантис Боловсролын Төвтэй хамтран 2011 оны 7-8 дугаар саруудад амжилттай зохион байгуулсан юм. Хаалтын арга хэмжээг Улаанбаатар хотоос гадна тус сургалтыг зохион байгуулсан Баруун, Хангайн, Төвийн, Говийн болон Зүүн бүсийн Мэргэжлийн боловсрол, сургалтын Арга зүйн төвүүдэд 2011 оны 8 дугаар сарын 20-22-ны өдрүүдэд мөн адил хийсэн.

Тус сургалтанд Монгол улсад нэн шаардлагатай байгаа уул уурхай, барилгын чиглэлээр нарийн мэргэжил олгодог 40 сургуулийн 187 багш хамрагдсан бөгөөд Мэргэжлийн боловсрол сургалтын Бүсийн Арга Зүйн Төвүүдийг түшиглэн Завхан, Орхон, Дархан-Уул, Дундговь, Дорнод, Улаанбаатарын бүсүүдэд уг сургалтыг нэгэн зэрэг явуулсан болно. Хичээлийг багш нарын зуны амралтыг тохиолдуулан “эрчимжүүлсэн” байдлаар явуулсан бөгөөд сургалтанд хамрагдагсад хүнд машин, механизмын оператор, барилгын мужаан, гагнуурчны мэргэжлийн техникийн үг хэллэг, мэргэжлийн Англи хэлийг үзэхээс гадна Ерөнхий Англи хэлний хичээлүүдийг олон улсын сургалтын стандартын дагуу заалгасан.

Сургалтын үр дүнг тооцох үүднээс тус сургалтанд хамрагдсан багш нарын Ерөнхий болон Мэргэжлийн англи хэлний мэдлэгийг Дэлхийн 120 гаруй улс оронд хэрэглэж байгаа ажлын байрны Англи хэлний түвшин тогтоох TOEIC тестээр сургалтын эхэнд болон төгсгөлд хоёр удаа шалгалт авсан байна. Шалгалтын дүнгээс харахад Мэргэжлийн сургалт, үйлдвэрлэлийн төвийн багш нарын Техникийн англи хэлний түвшин дунджаар 3.4 дахин дээшилсэн байгаа нь сургалт маш үр дүнтэй зохион байгуулагдаж, багш нарын мэдлэг, ур чадварыг дээшлүүлэхэд бодитой хувь нэмэр оруулсан арга хэмжээ боллоо гэж үзэж байна. Сургалтын үр дүнд багш нарын техникийн болон ерөнхий англи хэлний мэдлэг дээшлэхийн сацуу ММСС-ийн хөрөнгө оруулалтаар нийлүүлэх сургалтын техник хэрэгсэл, тоног төхөөрөмжийг зөв зүйтэй ашиглах, сургалтын хэрэглэгдэхүүн боловсруулах, сургах, суралцах арга барилыг эзэмшиж, мэргэжлийн багш нарын харилцаа, хамтын ажиллагаа бэхжих таатай нөхцөл бүрдсэн юм.

Сургалтыг амжилттай дүүргэсэн МСҮТ-ийн багш нарт олон улсын ТОEIC тестийн гэрчилгээ, ММСС ба Сантис Боловсролын Төвийн гэрчилгээ болон ММСС-гийн МБС-ын төсөл, Сантис Боловсролын Төв, орон нутгийн сургалтыг зохион байгуулсан МСҮТ-ийн батламж бичгийг тус тус гардууллаа.