Дэлхийн аваргын хэсгийн тоглолт өндөрлөлөө

Шайбтай хоккейн 2018 оны ДАШТ Дани улсад үргэлжилж байгаа билээ. Урьд шөнө тэмцээний хэсгийн тоглолтууд өндөрлөж хасагдах шатанд өрсөлдөх найман баг тодроод байна. А хэсгийг Шведийн баг тэргүүлж Орос, Чех болон Швейцарын шигшээ багууд удаах байруудаар хасагдах шатанд шалгарсан бол В хэсгийг Финландууд тэргүүлж АНУ, Канад, Латвийн шигшээ багууд удаалжээ.

Тэмцээний А хэсэгт Швед болон Оросын шигшээ багууд хэсгээ тэргүүлэхийн төлөөх шийдвэрлэх тоглолтыг хийж Шведүүд ялалт байгуулснаар хэсгээ тэргүүллээ. Тоглолтын эхний гоолыг К.Капризов ердөө эхний гурван минутын дотор оруулсан ч Шведүүд хоёрдугаар үед тоглолтыг эргүүлж NHL-д тоглодог М.Зибанежад, Р.Раккель болон М.Экхольм нарын гоолоор ялалт байгуулсан.

Тэгвэл мөн В хэсгийн тэргүүлэгчийн төлөө Финланд болон АНУ-ын шигшээ багууд хэсгийн сүүлчийн тоглолтоо хийж Финчүүд 6-2 харьцаатай Нэгдсэн улсын багийг буулгаж авсан байна. Ингээд Финчүүд хэсгээ тэргүүлсэн бол АНУ-ын шигшээ баг хэсгээсээ хоёрдугаар дараагийн шатанд гарч А хэсгийн гурваар гарч буй Чехийн шигшээ багтай таарч байна. Хасагдах шатны тоглолтууд маргааш эхэлнэ.

Хасагдах шатны тоглолт