Монголын спортын түүхэн дэх хамгийн өндөр шагналын сантай хөлбөмбөгийн “Мазала” үндэсний дээд лигийн тэмцээний тоглолтууд амралтын өдрүүдэд болж байна.

Үндэсний Дээд лигт “Атлетик 220”, “Арвис”, “Гоёо Эф Си”, “Дэрэн”, “Сэлэнгэпресс”, “Улаанбаатар сити”, “Хангарьд”, “Жипро”, “Эф Си Улаанбаатар”, “Эрчим” гэсэн 10 баг өрсөлдөж байна.

Өчигдөр хөлбөмбөгийн холбооны талбайд тус тэмцээний 3-р тойргийн тоглолт эхэлж, “Улаанбаатар сити”, “Андууд сити” хожил авлаа. Өчигдрийн болон өнөөдөр болох тоглолтын мэдээллийг хүргэе.

“Улаанбаатар сити”, “Жипро” багууд  3-р тойргийн нээлтийг хийлээ. Тус тоглолтод өнгөрсөн жил үндэсний дээд лигийн мөнгөн медалийг хүртсэн “Улаанбаатар сити” өрсөлдөгчөө 2:0 онооны харьцаагаар хожиж, шинэ улирлын анхны ялалтаа байгуулав. Хожил авч ирсэн хоёр гоолыг “Дэрэн”-ээс “Улаанбаатар сити”-д шилжсэн А.Нармандах оруулж, тоглолтын шилдэг нь боллоо.

Тоглолтын шилдэг болсон А.Нармандах “Мазала” үндэсний дээд лигийн ивээн тэтгэгч “Хар сармис”-ын дээжээс авсан бөгөөд тоглолт бүрийн дараа шилдэг тоглогчдод энэхүү шагналыг өгөх юм. “Улаанбаатар сити” анхны хожлоо бүртгүүлсэн бол шинээр дэвшин гарсан “Жипро” хараахан гоол оруулж, оноо авч амжаагүй явна.

Өнгөрсөн тойрогт “Хангарьд”-ыг буулган авч улирлын анхны хожлоо аваад байсан “Андууд сити” клуб 3-р тойргийн тоглолтоо “Сэлэнгэпресс”-тэй эхлүүлж, 2:1-ээр хожлоо. Зүгээр ч нэг хожил бус эхний хагаст хожигдож яваад шийдвэрлэх үед хоёр гоол оруулан, эргэн ирэлт хийж гурван оноо авсан нь “Андууд сити”-ийн залууст сэтгэл зүйн том бэлэг болсон нь дамжиггүй. Нэгдүгээр үеийн минутад “Сэлэнгэдпресс”-ийн довтлогч Жон Эдвард гоол оруулж, улирлын анхны гоолоо өөрийн нэр дээр бичүүлэв.

Өнөөдөр дараах тоглолтууд болно.

ЭРЧИМ – АТЛЕТИК 220

Үндэсний дээд лигийн өнгөрсөн улирлын аварга “Эрчим”, хүрэл медальт “Атлетик 220” багуудын тоглолт 3-р тойргийн оргил тоглолтоор нэрлэгдэж байна. Ням гарагт болох энэ тоглолт “Мазала” үндэсний дээд лигийн 2018 оны улирлын эхний хагасыг тэргүүлэх багийг тодорхойлно гэхэд хилсдэхгүй. Жил бүр өндөр амжилттай тоглодог “Эрчим”-ээс хэн оноо салгаж чадсан нь тухайн улиралдаа медаль хүртдэг гэсэн үзүүлэлт бий. Өнгөрсөн жил “Эрчим”-тэй тэнцсэн “Улаанбаатар сити”, “Атлетик 220”, түүний өмнөх улиралд “Хангарьд”, “Хоромхон” багууд мөн л “Эрчим”-ийг хожсон нь чухал нөлөө үзүүлж мөн медалийн тавцанд хүртсэн юм. Тиймээс энэ тоглолт талбайн эзэн “Эрчим”-ээс илүү зочлон тоглох “Атлетик 220”-ийн залууст маш чухал тулаан байх болно.

• Шууд үзэх холбоос: https://mycujoo.tv/video/mongolia-football-federation…

АРВИС – ДЭРЭН

Нэгдүгээр тойрогт “Улаанбаатар сити”-ээс оноо салгасан ч өнгөрсөн долоо хоногт “Атлетик 220”-д 3:0-ээр хожигдсон “Арвис”-ын залуус “Мазала” үндэсний дээд лигийн гурав дахь тоглолтоо “Дэрэн” клубтэй хийнэ. Жил бүр тогтмол амжилт үзүүлж буйн нэг шалтгаан нь “Дэрэн” клуб том багуудын эсрэг хүчтэй өрсөлдөөн үзүүлэхээс гадна ижил түвшний багуудаас оноо салгадаг явдал юм. Дээд лигт тоглож сурсан “Дэрэн”-ийн эсрэг дээд лигт анх удаа хүч үзэж байгаа “Арвис” багуудын тоглолт ням гарагт 16:00 цагт МХБХ-ны талбайд эхэлнэ.