Улсын хэмжээнд бүртгэлтэй 810 мянган автомашин байдаг ажээ. Үүнээс 600 мянга нь замын хөдөлгөөнд тогтмол оролцдог юм байна. Мөн үүний 54.5 хувь нь баруун гар талдаа хүрдтэй аж.

Замын цагдаагийн газраас гаргасан судалгаагаар зам тээврийн ослын дийлэнх нь шөнийн цагаар гардаг бөгөөд үүний 76 хувийг буруу талдаа хүрдтэй автомашин эзэлдэг байна. Учир нь баруун талдаа хүрдтэй автомашины гэрэл эсрэг урсгалаас ирж байгаа тээврийн хэрэгслийн жолоочийн нүд рүү шууд тусч, гялбуулдагтай холбоотой юм байна.

Зам, тээврийн хөгжлийн яамнаас 2018 оныг  замын хөдөлгөөний аюулгүй байдлын жил болгон зарласан. Энэ хүрээнд баруун гар талдаа буюу буруу талдаа жолооны хүрдтэй автомашины гэрлийн тусгалыг өөрчлөх ажлыг өнгөрсөн хоёрдугаар сараас эхлүүлээд байгаа. Энэ жилийн хувьд баруун талдаа хүрдтэй 100 мянган тээврийн хэрэгслийн гэрлийн тусгалыг өөрчлөх юм байна. Харин үлдсэн тээврийн хэрэгслийн гэрлийн тусгалыг өөрчлөх ажлыг жил бүр төлөвлөгөөний дагуу хэрэгжүүлэх болжээ.

Жолооч гэрлээ өөрчлүүлэхдээ оршин суугаа аймаг, дүүргийн Техникийн хяналтын үзлэгийн төвд хандах боломжтой аж. Гэрлийг өөрчлөхөд жолоочоос 1650 төгрөг гарах юм. Үүнийг Авто тээврийн үндэсний төв (АТҮТ) гэрлийг өөрчлөх бэлдэц авахад зарцуулах юм байна. Тус ажилд АТҮТ-өөс 229 сая төгрөг зарцуулахаар төсөвлөжээ.

Мөн баруун талдаа хүрдтэй автомашины гэрлийг гарын авлага, зааврын дагуу жолооч өөрөө өөрчлөх боломжтой гэнэ. Гэрлийг хэрхэн өөрчлөх талаар мэдээлэл авахыг хүсвэл яг одоо Сүхбаатарын талбайд болж буй төрийн хэвшлийн компаниудын өдөрлөгийг зориорой.   

Р.Ренчиндулам