Rio Tinto болон тус компанийн хоёр экс захирлыг Мозамбик дахь нүүрсний салбараа үнэгүйдүүлснээ хүлээн зөвшөөрөөгүйнх нь төлөө үүсгэсэн шүүхийн заргаа Австралийн компанийн зохицуулах байгууллага сунгалаа. Rio Tinto “буруу ташаа ойлголт төрүүлэхийн тулд” 2012 оны санхүүгийн урьдчилсан тайландаа Мозамбик дахь нүүрсний компаниа үнэгүйдүүлснээ хүлээн зөвшөөрөх ёстой хэмээн Австралийн үнэт цаас, хөрөнгө оруулалтын комисс (ASIC–Australian Securities and Investments Commission) үзэж байна. Rio Tinto нь Мозамбикт ажилладаг Riversdale Mining Limited-ийг 2011 онд дөрвөн тэрбум гаруй ам.доллараар худалдан аваад ердөө 50 сая ам.доллараар заржээ.

Rio Tinto-гийн гүйцэтгэх захирал байсан Том Албаниз, санхүү хариуцсан захирал асан Ги Эллиот нар тус компанийн 2012 оны санхүүгийн урьдчилсан тайланд бүртгэл тооцооны холбогдох стандарт “мөрдүүлж чадаагүй” хэмээн ASIC буруутгажээ. Тэд “хуулийн дагуу биелүүлэх ёстой үүргээ хөсөрдүүлж”, үнэгүйдүүлсэн мэдээллээ аудитын байгууллагад дамжуулаагүйг ASIC тайлбарлаж байна. Rio Tinto болон түүний хуучин хоёр захирлыг өнгөрсөн 10 дугаар сард АНУ луйврын хэрэгт буруутгасны дараа Австрали заргаа сунгасан юм. АНУ-ын зохицуулах байгууллага тус компанийг Мозамбик дахь нүүрсний уурхайн үнийг хөөргөдөж, олон тэрбум ам.долларын гарлагатай бүтэлгүй бизнес хийснээ нуухаар оролдсон хэмээн буруутгажээ. Rio Tinto болон ноён Албаниз, Эллиот нар бүртгэл тооцооны стандарт зөрчиж, нүүрсний уурхайн үнэлгээний талаар хөрөнгө оруулагчдад ташаа ойлголт төрүүлсэн хэмээн АНУ-ын үнэт цаас, биржийн комисс үзсэн юм. Их Британийн санхүүгийн удирдах газар Rio Tinto компанийг листингийн журам зөрчсөнийх нь төлөө аравдугаар сард 27.4 сая ам.доллараар торгосон. Rio-гийн хувьцааны үнэ мягмар гарагт Сиднейд 0.9 хувиар унаж, S&P/ASX 200 индекст үзүүлэлт нь 0.2 хувиар сайжирлаа.

Эх сурвалж: ‘Засгийн газрын мэдээ’ сонин