Эрүүл мэндийн даатгалын систем өнгөрсөн дөрөвдүгээр сарын 1-нээс эхлэн цахим хэлбэрт шилжиж байгааг тус салбараас мэдэгдсэн. Ингэснээр иргэний үнэмлэхээ ашиглан хөнгөлөлттэй эм авч болно, мөн цаашид иргэний үнэмлэхээ ашиглан эмнэлгийн ямар ч үйлчилгээ авдаг болно, иргэдийн цаг, мөнгийг хэмнэсэн үйлчилгээ нэвтэрлээ хэмээн зарласан. Энэ үйлчилгээ хэрэгжиж байгаа эсэхийг тодрууллаа. Сүхбаатар дүүргийн IV хороонд байрлах “Монфа-Бадаан” эмийн сан орж, энэ үйлчилгээ нэвтэрсэн эсэхийг эмийн санчаас нь асуулаа.

-Эрүүл мэндийн даатгалын систем цахим хэлбэрт шилжиж, иргэд иргэний үнэмлэхээрээ хөнгөлөлттэй эм авах боломжтой боллоо гэж салбараас мэдэгдсэн. Энэ хэрэгжиж байна уу?

-Иргэний үнэмлэх ашиглан хөнгөлөлттэй эм олгох систем одоогоор хэрэгжээгүй байна. Харин эмийг цахимаар олгож байгаа. Иргэн өрхийн эмнэлэгт үзүүлснээр эмч тухайн хүнд тохирсон жорыг цахимд бичиж үлдээнэ. Цахимд тусгай код ашиглан нэвтэрч тухайн хүний мэдээллийн дагуу хөнгөлөлттэй эм олгож байна. Түүнээс биш цахим үнэмлэхээ ашиглан хөнгөлөлттэй эм авдаг систем хэрэгжээгүй байгаа.

-Цахимаар хөнгөлөлттэй эм олгох болсноор ямар хүндрэл үүсч байна вэ?

-Өрхийн эмнэлэг ямар ч үед ачаалалтай байдаг. Цахим хэлбэрт шилжсэнээр ачаалал бүр нэмэгдэж, компьютер, интернет гацахаас эхлээд хүндрэлтэй байгаа гэж байна лээ. Харин иргэд үүнийг ойлгохгүй, бухимдалтай байна. Мөн дүүрэг харгалзаж хөнгөлөлттэй эм олгодог болсонд иргэд бухимдалтай байгаа. Дүүрэг бүрд эмийн сан харилцан адилгүй хэмжээтэй байдаг. Баянзүрх дүүрэг олон хүн амтай ч эмийн сан нь хангалттай байдаггүй юм шиг байна лээ. Эм нь хурдан дуусч байгаагаас иргэд бухимдалтай байсан. Иргэд орж ирээд “Дүүрэг харгалзалгүй олгохгүй гэж үү. Өдөр бүр олгож, дараалал үүсгэхгүй гэсэн яасан” гэж бухимдаж байгаа. Хөнгөлөлттэй эм авах хүн сарын эхээр олон байдаг.

-Эрүүл мэндийн даатгалаас  сард танайд хэдэн төгрөг орж ирдэг вэ. Мөн сард хэдэн хүнд хөнгөлөлттэй эм олгож байна?

-Манай эмийн санд сард 2.3 сая орчим төгрөг орж ирж байна. Өмнө нь дөрвөн сая төгрөг орж ирдэг байсан. Одоо энэ тоо бараг хоёр дахин багассан.

–Иргэд ихэвчлэн ямар төрлийн эм авч байна вэ. Танайд жагсаалтад багтсан эм бүгд байгаа юу. Үнийн хувьд хэдэн төгрөгөөр зарагддаг вэ?

-Ихэвчлэн 50-иас дээш насныхан болон бага насны хүүхдэд хөнгөлөлттэй эм авдаг. Зүрх судас даралтын эм хамгийн эрэлттэй байгаа. Хоёрдугаарт, хоол боловсруулах эрхтэн тогтолцооны эм, гуравдугаарт антибоитик эрэлттэй байна. Жагсаалтад багтсан эмийг бүгдийг олгохыг хичээдэг. Бусад эмийн сангийн адил зах зээлийн жишиг үнэ тогтоодог.

Эрүүл мэнд, нийгмийн даатгалын ерөнхий газар улсын хэмжээнд 861 эмийн сантай гэрээ байгуулан ажилладаг. Мөн улсын хэмжээнд 28 тэрбум төгрөгийг иргэд, даатгуулагчдадаа хөнгөлөлттэй олгох эмд зарцуулдаг. Харин нийслэлд 321 эмийн санд сардаа нэг тэрбум 31 сая төгрөгийн хөнгөлөлттэй эмээр үйлчлэх эрх өгдөг ажээ. 

Хөнгөлөлттэй олгох эмийн жагсаалтыг үзнэ үү.

Р.Ренчиндулам