Хятадын Шенжень хотноо болж буй оюутны 26-р “Универсиад” их наадам үргэлжилж байна. Өнөөдөр наадмын шатрын тэмцээний ес дэх буюу сүүлийн өргийн тоглолт болж, эмэгтэйчүүдийн төрөлд манай тамирчин, Их мастер Б.Мөнгөнтуул мөнгөн медаль хүртлээ. Б.Мөнгөнтуул сүүлийн өрөгт Оросын шатарчин Ирина Василивичийг хожсоноор ийн “Универсиад” наадмын мөнгөн медалийн болзол хангажээ. Б.Мөнгөнтуулын хувьд найман өргийн дараах байдлаар 6 оноотой тавдугаар байрт бичигдэж байсан бөгөөд эн тэнцүүхэн өрсөлдөөнтэй болж байсан “тулаан”-ы сүүлийн өрөгт хүчтэй өрсөлдөгчөө ялсан нь медаль хүртэхэд гол нөлөө үзүүлэв.

Манай бусад эмэгтэй шатарчдын хувьд тэмцээний эхний өдрүүдэд амжилттай тоглож байсан Их мастер Т.Батчимэг сүүлийн өрөгтөө хожигдсоноор 5,5 оноогоор 12-р байрт, Д.Янжиндулам 5 оноогоор 23-р байрт, Ө.Нямтуяа 4,5 оноогоор 37-р байрт тус тус шалгарсан байна.

“Универсиад” наадмын эмэгтэйчүүдийн шатрын тэмцээнд Хятадын тамирчин Тан Жонгуй түрүүлж, Б.Мөнгөнтуул удаалсан бол мөн БНХАУ-ын тамирчин Хуанг Киан хүрэл медалийн эзэн болжээ. Медаль хүртсэн эдгээр гурван тамирчин есөн өргийн дараах байдлаар адилхан 7 оноогоор тэнцсэн тул тамирчдын коэффицентийг нь харгалзаж, байр эзлүүлсэн байна.