Ой, хээрийн түймрийн нөхцөл байдлын талаар мэдээлэл хийлээ

Хуучирсан мэдээ: 2018.04.20-нд нийтлэгдсэн

Ой, хээрийн түймрийн нөхцөл байдлын талаар мэдээлэл хийлээ

Ой, хээрийн түймрийн нөхцөл байдлын талаар мэдээлэл хийлээ

Онцгой байдлын ерөнхий газраас өнөөдөр хэвлэлийн бага хурал зарлаж, ой, хээрийн түймрийн нөхцөл байдлын талаар дэлгэрэнгүй мэдээлэл хийлээ.

Хэвлэлийн бага хуралд ОБЕГ-ын дэд дарга, хурандаа Б.Ууганбаяр, Гамшгаас урьдчилан сэргийлэх газрын дарга, хурандаа Д.Батсайхан, Гал түймэртэй тэмцэх газрын дарга, дэд хурандаа Ц.Нямбаяр нар оролцсон юм.

Он гарсаар улсын хэмжээнд Архангай, Дорнод, Сүхбаатар, Сэлэнгэ, Завхан, Ховд, Хөвсгөл, Хэнтий зэрэг 8 аймгийн 16 суманд 21 удаагийн ой, хээрийн гал түймэр гарч урьдчилсан байдлаар 4828 га ой, 31999 га хээр, нийт 36827 га талбай тус тус түймэрт өртөж шатсан байна. Түймрийг унтраахад Онцгой байдлын байгуулагаас 341 алба хаагч, 29 автомашин, Хилийн цэргийн анги байгууллагаас 22 алба хаагч, 2 автомашин, орон нутгаас 667 иргэн, 75 автомашин, 53 мотоцикль, 39 морь, нийт 1030 хүн, 106 автомашин, 53 мотоцикль, 39 морьтой ажилласан.

2018 оны 04 дүгээр сарын 20-ны өдрийн байдлаар Хөвсгөл аймгийн Эрдэнэбулган суманд гарсан түймрийг унтраахаар Хөвсгөл, Булган, Орхон аймгийн Онцгой байдлын газрын 60 алба хаагч, 5 автомашин, орон нутгаас 136 иргэн, 5 автомашин, 8 мотоцикль, 31 морьтойгоор үүрэг гүйцэтгэж байна.

Харин Сүхбаатар аймгийн Сүхбаатар суманд гарсан түймрийн голомтонд тус аймгийн Онцгой байдлын газрын 12 алба хаагч, орон нутгийн 8 иргэн, нийт 20 хүн, 2 техник хэрэгсэлтэйгээр цурманд оруулан, бүрэн унтраахаар ажиллаж байгаа юм.

Цаг уур, орчны шинжилгээний газраас ирүүлсэн мэдээллээр ирэх тавдугаар сард Баян-Өлгий, Булган, Сэлэнгэ, Хэнтий аймгийн ихэнх нутаг, Увсын баруун, Ховд, Архангай, Төв, Сүхбаатар, Дорнодын хойд, Хөвсгөл аймгийн зүүн хэсгээр уур амьсгалын дунджийн орчим, бусад нутгаар уг дунджаас 0.5-1.0 градусаар дулаан байх төлөвтэй байгаа тул түймэр гарахаас урьдчилан сэргийлж хаврын хуурайшилттай үед цогтой үнс нурмаа битүү тагтай саванд хийх, тамхи, шүдэнзний галыг ил задгай хаяхгүй байх, ой хээрт явахдаа оч баригчгүй автомашин техникээр зорчихгүй байхыг анхаарууллаа гэж Онцгой байдлын ерөнхий газраас мэдээллээ.

NewsMN Гар утасны хувилбар Татах
NEWS.mn

Мэдээллийн эх сурвалж