Нийслэлд газар эзэмших, ашиглах эрхийн нээлттэй худалдаа өнөөдөр /2018.4.20/ болж, хоёр байршилд газар худалдлаа. Нийт дүнгээрээ 138 сая төгрөг хүрч, зарагдлаа. Энэ жил нийслэлд 29 байршилд газар худалдах юм. Газрын дуудлага худалдааны доод үнэ 44 сая бол дээд үнэ 784 сая төгрөгөөс эхлэн дуудагдах гэнэ. Газар эзэмших, ашиглах эрхийн нээлттэй худалдааны талаар нийслэлийн Газрын албаны Газрын менежмент, төлөвлөлтийн хэлтсийн хот байгуулалтын мэргэжилтэн М.Чимэддоржоос тодрууллаа.
-Энэ жил 29 байршилд газар худалдана гэсэн. Дуудлага худалдаагаар хоёр байршилд газар худалдлаа. Үнийн хувьд хэдээс эхэлж, хэдээр худалдсан бэ?
-НИТХ-аар 2017 онд нийслэлийн газар зохион байгуулалтын төлөвлөлтийг баталсан. Төлөвлөлтөөр 2018 онд 29 байршилд дуудлага худалдаагаар газар худалдана гэсэн байдаг. Үүнтэй холбоотойгоор нийслэлийн Засаг дарга энэ оны гуравдугаар сарын 21-нд захирамж гаргасан. Захирамжийн дагуу өнөөдөр дуудлага худалдаа зохион байгуулж хоёр байршилд газар худалдлаа. Тодруулбал, VI байршилд буюу Хан-Уул дүүргийн X хороонд 0.7 га газрыг 84.828,000 төгрөгөөс эхлэн дуудаж 89.830.000 сая төгрөгөөр худалдсан. Мөн X байршилд Хан-Уул дүүргийн X хороонд 0.39 га газрыг 47.366.000 төгрөгөөс эхлэн дуудаж 48.362.000 төгрөгөөр худалдлаа.
-Дуудлага худалдаанд орох газар болон, үнийг хаанаас хэрхэн тогтоодог вэ. Энэ удаагийн дуудлага худалдааны онцлог юу байсан бэ?
– Дүүргүүдийн газрын албатай хамтран газар ашиглалтын судалгаа явуулж, түүнийг үндэслэн НИТХ-аар хэлэлцэж, тогтоол гаргадаг. Тогтоолд үндэслэн нийслэлийн Засаг дарга захирамж гаргаснаар тухайн газар дуудлага худалдаанд ордог. Барилга, хот байгуулалтын яам 2015 онд дуудлага худалдааны үнийг тогтоосон байдаг. Энэ үнэлгээ нь зах зээлд бодит бус, хэт өндөр үнэтэй байсан. Барилга хот байгуулалтын сайд 2018 онд шинээр тушаал гаргаснаар энэ удаагийн дуудлага худалдаа зах зээлтэйгээ уялдсан, боломжийн үнээс эхэлсэн. Өнөөдөр худалдаалагдсан хоёр газар зах зээлийн үнээс харьцангуй хямд байсан гэж хэлж болно.
-Дуудлагаар худалдаж буй газар ихэвчлэн хотын аль хэсэгт байрлаж, ямар зориулалтаар ашиглагдах вэ?
-Төлөвлөгөөний дагуу Баянзүрх дүүрэгт орон сууц болон аялал жуулчлалын зориулалттай хоёр газар байна. Хан-Уул дүүрэгт 11 байршил, Сонгинохайрхан дүүрэгт ес, Налайхад тав, Багахангайд хоёр байршилд газар худалдана. Орон сууц, худалдаа үйлчилгээ, үйлдвэрлэл, аж ахуйн чиглэлээр ашиглагдана.
-Хамгийн өндөр болон бага үнэ нь хэдээс эхэлж байгаа вэ?
-Эхэлж дуудагдах үнэ газрын талбайн хэмжээ болон байршлаас шалтгаалж байгаа. Хан-Уул дүүргийн VIII хороонд таван га газрыг худалдаа үйлчилгээний зориулалтаар 784 сая төгрөгөөс эхлэн дуудна. Хамгийн бага үнэлгээтэй нь Налайхад 44 сая төгрөгөөс эхлэн дуудагдана.
-Дараагийн дуудлага худалдаа хэзээ болох вэ. Онцлог нь юу байх бол?
-Энэ удаагийн дуудлагаар хоёр байршлын газар худалдлаа. Үлдсэн 27 байршлын газрыг иргэн, аж ахуйн нэгж бүрд нээлттэйгээр, ил тод зохион байгуулна. Дараагийн дуудлага худалдааг энэ оны тавдугаар сарын 3-нд цахим хэлбэрээр явуулахаар төлөвлөж байна. Үүнтэй холбоотой мэдээллийг газрын биржийн www.mle.mn сайтаас авч болно. Цахимаар эхний ээлжинд гурван байршилд газар худалдана. Газрын бусад худалдааг цахим болон танхимын хэлбэрээр зохион байгуулна. Дуудлага худалдаа нь иргэн, аж ахуйн нэгж бүрд нээлттэй. Мөн дараагийн удаа үлдсэн 27 байршилд бус сая дуудлага худалдаа явуулах үеэр иргэдийн сонирхож байсан байршилд ойрын хугацаанд дуудлага худалдаа зохион байгуулах төлөвлөгөөтэй байгаа.
Газар эзэмшүүлэх, ашиглуулах эрхийн дуудлага худалдаа эхлэх үнэ
д/д | Дүүрэг | Хороо | Газрын байршил | Газрын зориулалт | Хэмжээ /га/ | Дуудлага худалдааны үнэ /БХБС-ын 2018 оны 15 дугаар тушаал/ |
1 | Баянзүрх | 11 | Улаанбаатар-Налайхын чиглэлийн авто замын хойд талд | Амины сууцны хороолол | 3,46 | 383302687 |
2 | Баянзүрх | 20 | Хадатын аманд | Амралт, аялал жуулчлал | 3,32 | 146880000 |
3 | Хан-Уул | 8 | Чингис хаан ОУНБ-ын баруун урд | Үйлчилгээ | 5 | 784453500 |
4 | Хан-Уул | 10 | Чингис хаан ОУНБ-ын баруун урд | Амины сууцны хотхон | 2,23 | 248064901 |
5 | Хан-Уул | 10 | Чингис хаан ОУНБ-ын баруун урд | Конторын барилга | 1,14 | 137573728 |
6 | Хан-Уул | 10 | Чингис хаан ОУНБ-ын баруун урд | Орон сууц | 0,7 | 84828944 |
7 | Хан-Уул | 10 | Төв аймаг чиглэлийн авто зам дагуу | Худалдаа, үйлчилгээ | 0,8 | 124000000 |
8 | Хан-Уул | 10 | Төв аймаг чиглэлийн авто зам дагуу | Үйлчилгээ | 1 | 158228702 |
9 | Хан-Уул | 10 | Чингис хаан ОУНБ-ын баруун урд | Худалдаа, үйлчилгээ | 0,83 | 187736472 |
10 | Хан-Уул | 10 | Чингис хаан ОУНБ-ын баруун урд | Орон сууц | 0,39 | 47361165 |
11 | Хан-Уул | 10 | Морингийн гэр хорооллын урд | Орон сууц | 4 | 440800000 |
12 | Хан-Уул | 10 | Морингийн гэр хорооллын урд | Орон сууц | 4 | 440800000 |
13 | Хан-Уул | 14 | Түргэний гол дагуу | Аж ахуй, фермер | 3,75 | 252489733 |
14 | Сонгинохайрхан | 21 | Рашаант өртөөний зүүн талд | Аж ахуйн | 8,03 | 354120000 |
15 | Сонгинохайрхан | 21 | Баруун турууны давааны баруун хойд талд | Аж ахуйн | 3,02 | 133680000 |
16 | Сонгинохайрхан | 32 | Магнай трейд ШТС-ийн баруун урд талд | Хийн түлшээр цэнэглэх станц | 0,105 | 116300000 |
17 | Сонгинохайрхан | 32 | Авто худалдааны цогцолборын бүс 6, барилга 7 | Зочид буудал, худалдаа, үйлчилгээ | 1,1 | 177700000 |
18 | Сонгинохайрхан | 32 | Авто худалдааны цогцолборын бүс 6, барилга 8 | Зочид буудал, худалдаа, үйлчилгээ | 1,1 | 177700000 |
19 | Сонгинохайрхан | 21 | Тусгалын аманд | Хүлэмжийн аж ахуй | 17 | 748800000 |
20 | Сонгинохайрхан | 21 | Нарийны эх, Хөшигт уулын урд | Аялал жуулчлал | 5 | 220800000 |
21 | Сонгинохайрхан | 21 | Бөөр толгойн өвөрт | Хөдөө аж ахуйн үйлдвэрлэл | 7 | 308800000 |
22 | Сонгинохайрхан | 21 | Ар Шижирийн аманд | Хүлэмжийн аж ахуй | 5 | 220800000 |
23 | Налайх | 5 | Гандан уулын урд талд | Үйлдвэрлэл | 1 | 44800000 |
24 | Налайх | 5 | Гандан уулын урд талд | Үйлдвэрлэл | 1 | 44800000 |
25 | Налайх | 5 | Гандан уулын урд талд | Үйлдвэрлэл | 1 | 44800000 |
26 | Налайх | 5 | Гандан уулын урд талд | Үйлдвэрлэл | 1 | 44800000 |
27 | Налайх | 5 | Гандан уулын урд талд | Үйлдвэрлэл | 1 | 44800000 |
28 | Багахангай | 1 | Үйлдвэрлэлийн хими 1 | Үйлдвэрлэл | 5 | 220800000 |
29 | Багахангай | 2 | Улаанбаатар-Замын Үүд чиглэлийн төмөр замын зүүн талд | Худалдаа, үйлчилгээ | 1 | 44800000 |
ДҮН | 89 | 6384819832 |
Р.Ренчиндулам