Ахлах ангийн сурагчдад мэргэжил, элсэх сургуулиа сонгоход сургалтын чанар, төлбөрөөс эхлээд олон асуудал тулгардаг. Тэгвэл өчигдрөөс буюу энэ сарын 13-ны өдрөөс эхлэн МҮЭСТ-ийн  ордонд 15-ныг дуустал их дээд сургуулиудын үзэсгэлэн болж байна. Тус үзэсгэлэнг БСШУСЯ, Боловсролын үнэлгээний төв, Хүүхэд гэр бүл залуучуудын төв хамтран зохион байгуулж байгаа юм.

Нээлтийн эхэнд МҮЭСТ-ийн ордон нийгэмд хэрэгтэй үйл ажиллагаа явуулах үүргийнхээ хүрээнд “Боловсролын супермаркет” үзэсгэлэнг гурав дах, жилдээ зохион байгуулж байгаа гэдгийг онцоллоо.  

Үзэсгэлэнгийн гол зорилго нь дэлхийд эрэлттэй мэргэжлүүдийг танилцуулж, сургуулиудын үйл ажиллагааг ахлах ангийн сурагчдад таниулж тэдгээрийн сонголтод хувь нэмэр оруулах зорилготой юм. Цаашдаа ч үйл ажиллагаагаа тасралтгүй зохион байгуулах болно. Сурагчдыг өргөнөөр ирж, ирээдүйн мэргэжлээ зөв сонгоорой хэмээн  МҮЭСТ ордны соёл, спорт хамтын ажиллагааны албаны дарга Б.Туул хэлсэн юм. 

Нээлтийн үеэр 84 дүгээр сургуулийн сурагчид ая дуугаа өргөсөн бөгөөд сургуулиудын төлөөлөл өөрсдийн сургууль, мэргэжлүүдийн онцлогийн талаар товчхон мэдээллүүдийг сурагчид болон хүрэлцэн ирсэн иргэдэд танилцуулж байлаа.

Ирсэн хүмүүст  сургуулиудын онцлог давуу талыг харуулсан бүтээлүүд угтлаа. Тухайлбал “Урлах эрдэм сургууль”-ийн загварын эртний хатдыг санагдуулам сүржин дэрвэгэр хормойтой, мөрөн дээр нь тунаж оёсон шигтгээтэй даашинз нүдэнд тусаж байв.

Үзэсгэлэн үйлдвэрчний эвлэлийн нэг давхарт болж байгаа учир гаднаас их дээд сургуулиудын танилцуулга том дэлгэцээр ээлжлэн харагдаж давхар мэдээллийг нь унших аж.

Мэргэжил бүхэн сайхан

Уг үзэсгэлэнг ЕБС-ын төгсөх ангийнханд зориулан хийж байгаа, тийм ч учраас элсэлтийн ерөнхий шалгалтад бэлтгэх журмыг танилцуулж, мэргэжлээ хэрхэн зөв сонгох зөвлөмж өгч байлаа. Мөн засгийн газрын тэтгэлэг болон зээлийн санд хэрхэн хамрагдах тухай зөвлөгөөг ч бас хүргэж байв.

Уг үзэсгэлэнд дотоод гадаадын их сургууль, МСҮТ, коллеж, гадаадад оюутан зуучлах төвүүд, сургалтын төвүүд оролцож буй. Тодруулбал  АШИҮИС, “Мандах” их сургууль, Барилгын технологийн коллеж, Шинэ анагаах ухааны их сургууль, Gate, Урлах эрдэм их сургууль, Хүүхэд гэр бүл залуучуудын төв, Боловсролын зээлийн сан, “Хүрээ” солонгос хэлний сургалтын төв зэрэг байгууллагууд оролцож байна. Онцлог давуу талын хувьд ЕБС-ын ахлах ангийн сурагчдад мэргэжил, сургуулиа зөв сонгоход тусалж, тэдний ирээдүйд эерэгээр хувь нэмрээ оруулах юм гэж  МҮЭСТ ордны үйл ажиллагаа хариуцсан маркетингийн мэргэжилтэн Б.Мөнхжаргал хэллээ.

Мэргэжил сонголтыг хийхдээ зарим хүүхдүүд өөрсдийн хүслээр сонголтоо хийдэг бол, зарим нь эцэг эх болоод бусдын тусламж, зөвлөгөөг авсны үндсэн дээр сонголтоо хийдэг.

Тэгвэл үзэсгэлэнд оролцож буй “Сэтгүүлч дээд сургууль”-ийн төгсөх ангийн оюутан Б.Жаргалцэцэг  “Мэргэжил бүхэн сайхан. Гэхдээ одоо төгсөж байгаа дүү нартаа хандаж хэлэхэд өөрийн дотроо хүсч, зорьж буй мэргэжлээ сонгох хэрэгтэй. Тэгвэл чи илүү их хичээл зүтгэж гаргаж, хөдөлмөрлөж түүний үр дүнд сайн боловсон хүчин  болж чадна. Миний хувьд сэтгүүлч мэргэжлийг сонгосон. Харин сургуулийн тухайд сэтгүүл зүйн тогоон дотроо танигдсан “Сэтгүүлч” дээд сургуулийг сонгон суралцсан. Манай сургуулийн онцлог гэвэл илүү дадлага давамгайлсан сургалттай бөгөөд төгсөөд гарахдаа мэргэжлийн сэтгүүлчийн хэмжээнд очиж, мэдээ мэдээллийг бэлтгэж, техник хэрэгсэлтэйгээ ч харьцаж, ажлын байраар 100 хувь хангагдан гардаг. Би “Сэтгүүлч” дээд сургуулийг сонгосондоо хэзээ ч харамсаж байгаагүй гэлээ.

Боловсролын үзэсгэлэн бямба ням гаригт үргэлжилнэ 

Сургуулиуд өөрсдийн танилцуулгыг зурагт, зурагт хуудас, ном, дэлгэц, бүтээлүүдээр гаргаж, зарим нь бүр жигд өнгийн хувцсаар ижилсэн байх нь эмх цэгцтэй харагдах аж. Үүний нэг болох АШУҮИС-н оюутнууд цагаан өнгийн халатаар жигдрэн, сургуулийн логог халатандаа наасан байх нь тэднийг үггүйгээр илтгэнэ.

Тэр дунд Техник технологийн сургууль өөрсдийн урласан жижиг загварын оёдлын машин, дугуй,  бургер, салат, сэндвич зэргийг ширээн дээр өрөн байрлуулжээ.  

Ахлах ангийн сурагч Б.Дэлгэрсайхан “Миний хувьд эмч болох сонирхолтой ч яг аль сургуульд орохоо хараахан сонгоогүй. Тийм учраас цахим орчноос энд боловсролын үзэсгэлэн болох гэж байгааг мэдээд ирсэн үзэсгэлэнд оролцсоноор сургуулиудын ерөнхий танилцуулга болоод тэдгээрийн үйл ажиллагаатай танилцаж мэдээлэлтэй болсондоо баяртай байна” гэлээ.  12 дугаар ангийн сурагч Ц.Болорчимэг “Бидэнд зориулсан боловсролын үзэсгэлэн болж байгаа нь мэргэжил сургуулиа сонгох шатанд ирсэн хүүхэд залууст их хэрэгтэй үйл ажиллагаа болж байна. Бусад хүүхдүүддээ хандаж хэлэхэд та бүхэн энд ирээд өөрийн ирээдүйн алхмаа зөв хийхэд тусламж, зөвлөгөө аваарай гэж хүсэх байна” гэв. 

Үүдээр орж ирж буй хүүхдүүд нэлээн дараалал үүсгэжээ. Учир нь хүүхдүүдийн дунд сугалаат уралдааныг зохион байгуулж тэдгээрийн нэр утасны дугаарыг угтагч эмэгтэй бүртгэн авна. Шагналд нь МҮЭСТ ордонд үзвэр үзэх эрх хожно гэнэ хэмээн хүүхдүүд хоорондоо ам дамжин ярьж байв.  Энэхүү боловсролын үзэсгэлэн нь дөрөвдүгээр сарын 14, 15-ны бямба, ням гаригт ч үргэлжлэх аж.  

Э.Ариун