Сүүлийн үеийн залуусын чөлөөт цагаа өнгөрөөх хэрэгсэл нь сошиал нэтворкинг сайтууд буюу бидний сайн мэдэх facebook, twitter, hi5 зэрэг сайтууд болжээ.

Түүний дотроос яах аргагүй facebook бол хамгийн олон хандалттай вэб сайт юм. Харин одоо фэйсбүүкийг зөвхөн чөлөөт цагаа биш ажил төрөл, сурч боловсрох үйлсэд ашиглах болжээ.

Байнгын интернэт холболттой юмуу, заавал ажлаа оффис дээрээсээ хийх шаардлагагүй албан газрууд facebook-д групп үүсгэж бусадтайгаа холбогдож ажлаа явуулах болсон байх юм. Энэ аргаар ажлаа явуулах нь туйлын амар хялбар бөгөөд, үр бүтээмж өндөртэй байгаа тухай ингэж ажиллаж үзсэн хүмүүс ярих нь ч бий.

Та ч гэсэн оролдоод үзэхэд буруудах юу байхав. Харин групп үүсгэсний дараа барын талд буй Edit Group цэсээр орж нууцлалын тохиргоог Secret болгохгүй бол бизнесийн тань алтан нууцыг фэйсбүүкээр тэнэгчид олоод мэдчихнэ шүү.

Өөр бас нэг жишээ бол сонирхол, мэргэжил нэгтэй залуус фэйсбүүкт групп үүсгэж бие биенээсээ туршлага судлаж, сурч боловсорч, хамтран ажиллах хандлагатай болсон байна. Саяхан нэг вэб сайт хийх үйлчилгээ үзүүлдэг компанид ажилладаг залуу “Монголын Жава Хөгжүүлэгчид” нэртэй бүлгэм үүсгэжээ. Нээгдээд удаагүй байгаа ч олон залуус нэгдэж энэхүү бүлгэмээр бие биенээсээ суралцаж, санал бодолоо хуваалцаж байна. Та Oracle компанийн Java програмчлал -ын хэлийг сонирхдог бол энэ бүлгэмд бас нэгдээрэй.

Мөн вэб хийх сонирхолтой залуусын “Вэб хөгжүүлэгчдийн бүлэг” нэртэй бүлгэмч гэсэн нээгдээд нилээн идэвхтэй ажиллаж байгаа юм байна. Энэ мэтээр монгол залуус нүүрний номыг хөгжил дэвшилд зориулан ашиглацгааж байна.