Тавантолгойн төмөр замын ажлыг дахин эхлүүлэх асуудал яригдаж эхэлсэн. Энэ талаар Зам тээврийн хөгжлийн сайд Ж.Бат-Эрдэнээс тодрууллаа.

-Тавантолгойн төмөр замыг дахин эхлүүлэх асуудал хөндөгдөж байна. Энэ бүтээн байгуулалтын хөрөнгө санхүүг хэрхэн зохицуулах вэ?

-Төмөр зам барина гээд яриад явахад амархан. Улс төмөр замынхаа бодлогыг гаргасан. Энэ хүрээнд Тавантолгой – Гашуун сухайт, Тавантолгой – Сайншанд чиглэлийн төмөр замыг зайлшгүй хийх ёстой. Бидэнд мөнгө байсан бол өнөөдрөөс ч ажлаа эхлүүлж болно. Бодит байдлыг авч үзэхэд улс өөрөө төмөр зам тавина гэхээс илүү хувийн хэвшил тавих ёстой. Өнөөдөр Эрдэнэс Тавантолгой нүүрс олборлож байгаа шүү дээ. Энэ компани нүүрсээ зарахын тулд IPO гаргаад, нүүрснийхээ тээвэрлэлтийг хариуцаж яагаад болохгүй гэж. Нөгөөтэйгүүр Тавантолгой – Сайншандын төмөр замыг цэргүүдээр бариулах асуудал яригдаж байна. Ингэж болно. Улаанбаатар төмөр замыг өмнө нь цэргүүдээр бариулж байсан түүх бий. Гагцхүү мөнгөө хаанаас босгох вэ гэдэг л байна. Улс мөнгө босгож чадахгүй, Засгийн газар ч боломжгүй. Өрийн тааз дээшээ гарчихсан. Тэгэхээр төмөр зам бариулах мөнгө уурхай дээрээс л босно.

-Тавантолгойн төмөр замын ажлыг Монголчууд өмнө нь эхлүүлсэн. Тэр далангаа цааш үргэлжлүүлнэ гэсэн үг үү?

-Далангийн талаар олон удаа ярьсан. 60 хувийн гүйцэтгэлтэй даланг 200 сая ам.доллараар хийсэн. Тэрхүү даланг зураг төслийн дагуу гүйцэтгэсэн. Гагцхүү өнгөрсөн хоёр, гурван жилийн хугацаанд бороо, шороонд урсах, элэгдэх асуудал үүснэ. Одоо 400 сая ам.долларын хөрөнгө оруулалт хийх шаардлагатай. Энэ хөрөнгийг хэрхэн, яаж босгох вэ гэдгийг л хэлээд байгаа юм.

Т.НОМИН