МАХН, МҮАН, ИЗНН, Ногоон намын удирдлагууд өнөөдөр /2018.03.30/ Оюутолгойн хөрөнгө оруулалтын гэрээтэй холбогдуулж сэтгүүлчдэд мэдээлэл хийлээ.

Мэдээллийн эхэнд ИЗНН-ын дарга Ц.Ганхуяг “Оюутолгойн гэрээг цуцлах үндэслэлийг бид танилцуулж байна. Оюутолгой компани нөөцөө шинэчлэн тогтоосон байна. Өнөөдрийн ханшаар зэс 289.3 тэрбум ам.долларын үнэд хүрэхээр байна. 97.6 тэрбум ам.долларын алт, 6 тэрбум ам.долларын мөнгө, 5.1 тэрбум ам.долларын молубедин гэж тооцохоор байна. Эдгээр мөнгийг нэгтгээд, Монголын хүн амын тоонд хуваавал нэг хүнд 132 мянган ам.доллар ногдохоор баялаг энд байна.

Монгол Улс Оюутолгойн хөрөнгө оруулалтын гэрээг байгуулахдаа өөрийн 34 хувийг хүүтэйгээр гадаадын компаниас зээлсэн. Оюутолгой эдийн засгийн эргэлтэд ороод найм, есөн жил болж байгаа атал борлуулалтын хувь орж ирэхгүй байгаа төдийгүй алтаа Монголбанкинд тушаахгүй байна. Монгол Улс Оюутолгойн эзэн атлаа баялгаа шавхагдтал захиран зарцуулах эрхгүй болсон” гэлээ.

Харин МАХН-ын дарга Н.Энхбаяр “Оюутолгойн гэрээг байгуулах үеэр би С.Баяр, С.Баярцогт нарт хандаж ‘Ийм муу гэрээ хийж болохгүй’ гэж байр сууриа илэрхийлж байсан. Харамсалтай нь, тэд зүтгэсээр байгаад энэ гэрээг байгуулсан.

Оюутолгойд 400 тэрбум ам.доллараар хэмжигдэх баялаг байна. Монголд ямар ч ашиггүй гэрээ болсон. Монголын газар нутагт байгаа баялгийг эдийн засгийн эргэлтэд оруулахдаа өөрсдөө өртэй болчихсон. Үндсэн Хуулийн 6.1-ийг зөрчсөн. Үүнийг УИХ санаатайгаар хуйвалдаж, өөрсдийнхөө хувийг 34 хувь байна гэж луйврын гэрээ байгуулах суурийг нь тавьж өгсөн.  УИХ Засгийн газартайгаа хуйвалдаж, Монгол ашиггүй гэрээний хууль эрх зүйн орчинг бүрдүүлж өгсөн” гэв.

МҮАН-ын дарга Б.Цогтгэрэл “2009 оны есдүгээр сарын 7-нд Оюутолгойн гэрээг байгуулж байсан ажлын хэсэгт 34 заалт бүхий шаардлага хүргүүлж байсан. Гэв өнөөдөр энэ шаардлагаас нэгийг ч биелүүлээгүй байгаа. Арваад жилийн дараа харахад энэ гэрээ хөрөнгө оруулалтын гэрээ биш, Рио Тинтод  мөнгө олж өгөх, зээл олж авах гэрээ болж хувирчээ. Иймээс Оюутолгойн гэрээг эргэн харах, цаашлаад цуцлах хүртэл арга хэмжээг авах шаардлагатай” гэлээ. 

Г.ХОРОЛ