Хүүхдийн цүнхэнд түгшүүр зарлах цаг болжээ. Сүржигнэж, хийрхэж байгаа зүйл огт биш. Энхрий бяцхан үрсийн эрүүл мэндэд сөргөөр нөлөөлж байгаа болохоор түгшүүр зарлахаас өөр арга алга. Бидний хэнэггүй байдлаас болж үр хүүхдүүд минь өвчтэй нэгэн болж байна. Эмнэлгүүдэд нуруу нь мурийсан, нэг мөр нь унжсан, хөдөлгөөн нь саарч, өсөлт нь зогссон, биеийн хэлбэр галбир нь алдагдсан, үргэлж газар ширтэж, бөгтийж явдаг олон хүүхэд хандаж байна. Жижигхэн бие нь яаж дааж байгаа юм бол гэмээр ахадсан том цүнхтэй хүүхдүүд ерөнхий боловсролын дунд сургуулиар холхиж байна. Хэн ч үүнийг анхаарч өнөөдрийг хүртэл ямар нэгэн дорвитой арга хэмжээ аваагүй. Эмч мэргэжилтнүүд

“Хүүхдэдээ хүнд цүнх битгий үүрүүл. Эрүүл мэндэд нь асар хортой. Биед нь таарсан жижиг цүнх авч өг. Өдөр болгон хичээлийн хуваарийн дагуу ном дэвтрийг нь хамтдаа ялгаж бай. Хичээлд нь шаардлагатай ном, дэвтэр, харандаанаас өөр зүйл цүнхэнд нь битгий байлга”

гэж зөвлөсөөр байгаа. Гэтэл эцэг, эхчүүд үүнийг огт тоохгүйн дээр зарим нь мэдсэн ч мэдээгүй юм шиг өнгөрсөөр байгаа нь хамгийн их аюул дагуулж байгаа юм. Эцэг, эхчүүдийн хэнэггүй нь дэндсэн энэ байдлаас болж хэчнээн хүүхэд нурууны өвчтэй, өсөлт нь удааширч, тулгуур хөдөлгөөний систем болон биеийн галбирт асуудал үүсэж, хөлийн ул хавтгай болох, мөрний хэлбэр өөрчлөгдсөн байгааг хэлэх аргагүй болжээ. Учир нь, энэ анхаарал татсан асуудлыг эрүүл мэндэд үзүүлэх нөлөөг нягтлан судалсан судалгаа байхгүй байна. Эмч мэргэжилтнүүдийн хэлж байгаагаар хүүхэд цүнх, үүргэвчиндээ түүртэн байнга бөгтийж явбал хараа, зүрхний үйл ажиллагаа, дотоод эрхтнүүдийн үйл ажиллагаа алдагддаг гэнэ. Үүнээс болж хүүхдийн толгой өвдөж, ядарч, толгой нь эргэж, нуруу нь байнга өвддөг болж байгааг онцлон хэлж байв.

Хүүхдүүд 4.5-5 кг цүнх үүрч байна

Саяхан нийслэлийн Эрүүл мэндийн газар холбогдох албадтай хамтран хүүхдүүдийн цүнхийг жинлэж үзжээ.

Зургаан настай сурагчдын цүнхийг жинлэж үзэхэд ихэнх нь 4.5-5 килограмм цүнх, дэвтэр, ном үүрч байсан гэнэ. Ихэвчлэн хүүхдүүд элдэв зураг, гоёл чимэглэлтэй биед нь хэд дахин томдсон, даавуун биш материалаар хийсэн цүнх үүрч байгаа нь судалгааны явцад анзаарагдсан байна. Эцэг, эхчүүд гоё ганганыг нь харахаас хүүхдийн биед эвтэйхэн, хөвөн даавуун материалтай, хөнгөн цүнх сонгохгүй байгаа нь алдаа аж.

Харин дараагийн алдаа нь хүүхэд цүнхэндээ зузаан сурах бичиг, дэвтэр үзэг, олон өнгийн харандаа, үзэгний сав, баллуураас эхлээд цаасны хайч, цавуу, цэвэр усны сав, хоёр янзын аяга, халбага, сэрээ гээд хэтэрхий олон зүйл багтаадаг. Бүр хүүхдийнхээ тоглох дуртай тоглоом, тэмдэглэлийн дэвтэр, тухайн өдөр орохгүй хичээлийн сурах бичиг зэрэг олон зүйлийг таны хүүхэд хүнд цүнхэндээ хийгээд үүрч явааг анзаардаггүй. Үүнээс болоод хүүхэд хавсарсан олон өвчтэй, өсөлт нь бага багаар саарах зэрэг сөрөг үр дагаврыг биедээ аажмаар тээсээр байдаг аж.

Цүнх хүүхдийн биеийн жингийн 10 хувьтай тэнцэж байх ёстой

Хичээлийн ном, хэрэгслийн хамт сурагч цүнхний (үүргэвчний) жин хүүхдийн биеийн жингийн 10 хувийн хэмжээнд байх ёстойг Португалийн шинжлэх ухаан, анагаахын төвийн мэргэжилтнүүд тогтоожээ. Тухайлбал, танай хүүхэд 35 кг жинтэй бол цүнх нь 3.5 кг-аас хүнд байх ёсгүй гэсэн үг юм.

Америкийн хүүхдийн эмч нарын академийнхан хичээлийн ном, хэрэгсэл бүхий сурагчийн үүргэвчний жин ямар байх ёстой тухай өөрийн хэм хэмжээг тогтоожээ.  Стандартын дагуу сурагчдын цүнх нь

• I анги –1.2 кг хүртэл;
• II анги –1.6 кг хүртэл;
• III анги –2.3 кг хүртэл;
• IV анги –2.6 кг хүртэл;
• V анги– 2.8 кг хүртэл;
• VI анги–3.1 кг хүртэл;
• VII-VIII анги – 3.5-3.6 кг хүртэл;
• IX-XII анги –4 кг хүртэл жинтэй байвал зохистой юм байна.