Японы мэргэжлийн сүмо бөхийн хаврын тэмцээнд ёкозүна Какүрюү М.Ананд 13 даваа, хоёр унаатайгаар түрүүллээ. Осака хотод болсон башёгийн сүүлийн өдөр буюу өчигдөр озэки Такаясү ёкозүна Какүрюүг давсан юм. Гэсэн ч Какүрюү өмнөх өдөр нь түрүүлэх болзлоо хангасан. Учир нь түүний араас нэхэж явсан Кайсэй гурван унаатай болсноор Какүрюүд өрсөлдөгч гараагүй юм.

Ёкозүна Какүрюү М.Ананд сүмогийн дээд зиндаанд дөрөв дэх удаагаа түрүүлж байна. Тэрбээр хамгийн сүүлд 2016 оны арваннэгдүгээр сарын тэмцээнд түрүүлж байжээ. Энэ бол түүний гурав дахь түрүү юм. Үүнээс хойш Какүрюү дээд зиндаанд хүчтэй өрсөлдөөнийг үзүүлж байсан ч түрүүгээ нэмж чадаагүй байсан. Харин 2018 онд эхний башё болох өнгөрөгч нэгдүгээр сарын тэмцээнд түрүүлэх боломж байсан ч тэмцээний сүүлийн өдрүүдэд баруун хөлийн шагайгаа гэмтээсэн. Улмаар башёгийн сүүлийн өдрүүдэд тааруу барилдаж, дараалан дөрвөн өдрийн барилдаанд ялагдан Гүржийн Точиношин түрүүлэх боломжтой болсон юм. Какүрюү башёг өнгөрөөгөөд хоёрдугаар сарын 1-нд мэс засалд орсон бөгөөд гуравдугаар сарын тэмцээнд аварга хүний хүч тэнхээг харуулан эзэн хааны цомыг дахин хүртлээ.

Хаврын башё гуравдугаар сарын 10-ны өдөр эхлэхэд дээд зиндаанд барилдаж буй 40 бөхийг Какүрюү М.Ананд тэргүүлсэн. Башёг ёкозүна Хакүхо М.Даваажаргал, ёкозүна Кисэносато нар өнжих үед их хариуцлага ёкозүна Какүрюү М.Ананд ирсэн.

Башёгийн эхний өдрүүдийн барилдаанд озэки Гоэйдо, Такаясү, сэкивакэ Точиношин нарын бөхчүүд унаж эхэлсэн нь Какүрюүгийн хувьд том боломж байлаа. 12 дахь өдрийг хүртэл Какүрюү ганцаараа унаагүй тэргүүлж байсан. Тэгвэл түүнийг унагасан бөх бөл Гүржийн бөх Точиношин бөгөөд тэрбээр энэ башёг 10 даваатайгаар өндөрлүүллээ. Тэр дундаа аварга Какүрюүг давсан гүрж бөхийн хувьд ирэх тавдугаар сарын тэмцээнд озэки цолны төлөө барилдах бүрэн боломж нээгдлээ.

Какүрюү М.Ананд сүүлийн өдрүүдийн барилдаанд хянамгай барилдаж, башёд түрүүлэх болзлоо сүүлийн өдрийн барилдааныг хүлээлгүй хангаж, эзэн хааны цомыг дахин өргөлөө.

Манай бөхчүүдээс Ичиножёо А.Ичинноров, Тамаваши Б.Мөнх-Оргил, Чиёошома Г.Мөнхсайхан нар 9 даваа, 6 унаатайгаар башёг өндөрлүүллээ. Харин Араваши Э.Дөлгөөн 15 барилдаанаас ердөө хоёр даваа авчээ.