НИТХ дахь АН-ын бүлэг сөрөг хүчний үүргийг гүйцэтгэх болсноосоо хойш “Хотын шийдэл” хэлэлцүүлгийг тасралтгүй хийж, хотын хөгжилтэй холбоотой, иргэдийн саналыг тусгасан тодорхой зөвлөмж, саналыг Нийслэлийн удирдлага болон дээд шатны байгууллагад хүргүүлээд байгаа.

Ц.Одонтунгалаг тэргүүтэй тус бүлгийн эмэгтэй төлөөлөгчдийн санаачилгаар “Хотын шийдэл – Хүүхдэд ээлтэй хот” хэлэлцүүлэг зохион байгуулсан. Тус хэлэлцүүлгийн үр дүнд хүүхдүүдэд ээлтэй үйлчилгээ, орчинг бий болгох, эхний ээлжинд мөнгө шаардахгүйгээр сэтгэл гарган хийж болох ажлын саналыг тусган зөвлөмж гаргаж, Нийслэлийн Засаг дарга С.Батболд, НИТХ-ын дарга С.Амарсайхан нарт гардуулсан юм.

Энэ хүрээнд нийслэлийн хэмжээнд хүүхдийн нөхцөл байдлын талаар улирал бүр харилцан мэдээлэл солилцож, хүүхдэд ээлтэй орчин бий болгохын төлөө ажлуудаа дүгнэж ажиллахаар төлөвлөсөн байна.

Харин одоо тус бүлэг Нийслэлийн эрх зүйн байдлын тухай хуулиар  хэлэлцүүлэг хийхээр бэлдэж байна. Тус хуулийн шинэчилсэн найруулгын төслийг УИХ-аар хэлэлцэж байгаа тул хаврын чуулган эхлэхээс өмнө иргэдийн саналыг тусгаж хүргэхээр зорьж байгаа аж.

Т.НОМИН