‘News’ агентлаг долоо хоног бүрийн пүрэв гариг “Яам, тамгын газраар сонин юу байна” буланг хүргэдэг билээ. Энэ удаа бид Гадаад харилцааны яам болон гадаадад томилогдох Элчин сайд нарын асуудлыг онцолж байна.

Монгол Улсыг гадаадад төлөөлж суух хэд хэдэн Элчин сайд эрхээ нээлгээгүй өнөөдрийг хүрч байна. Тухайн улс орнуудад шинээр томилогдох Элчин сайд нарыг Монгол Улсын Засгийн газар болон Ерөнхийлөгчөөс нэр дэвшүүлж, УИХ баталдаг. Эцэст нь Ерөнхийлөгч итгэмжлэх жуух бичгийг нь өгснөөр Элчин сайдаар томилогдлоо гэсэн үг. Тэгвэл  УИХ-аас, Засгийн газраас ‘виза’ авсан Элчин сайд нар Ерөнхийлөгч дээр гацсан. Тодруулбал, Монгол Улсаас АНУ-д суух Элчин сайдаар Ё.Отгонбаярыг, Канад улсад суух Элчин сайдаар Н.Чимгүүндарийг, Япон улсад суух Элчин сайдаар Г.Тэнгэр, БНСУ-д суух Элчин сайдаар Б.Хурц нарыг томилохоор Засгийн газраас Ерөнхийлөгчтэй зөвшилцөж, УИХ-аар батлуулсан. Гэвч Ерөнхийлөгч Х.Баттулга эдгээр Элчин сайдуудад итгэмжлэх жуух бичгийг нь гардуулахгүй байсаар өнөөдрийг хүрч байна. Томилогдохоо хүлээсээр тэд хагас жилийн нүүр үзэх нь. Хамгийн сүүлийн м Ерөнхий сайдын зүгээс Ерөнхийлөгчтэй ярилцаж, АНУ-д суух Элчин сайд Ё.Отгонбаярт итгэмжлэгдсэн жуухыг нь олгохоор тохиролцсон, тэрбээр энэ дагуу  БСШУС-ын дэд сайдын албаа өгсөн ч Ерөнхийлөгчийн Тамгын газраас итгэмжлэх жуух бичгийг нь гаргаж өгөхгүй ‘чангалж’ байгаа бололтой. Үүнээс болоод АНУ-ын тал болон Мянганы сорилтын сангийн хэрэгжилтийг дүгнэх хурал зэрэг чухал асуудлууд Элчин сайдаа томилогоог хүлээж мөн хойшлоод байгаа гэнэ.  Канад улсад суух Элчин сайдаар Н.Чимгүүндарь болон Япон улсад суух Элчин сайдаар Г.Тэнгэр нари итгэмжлэгдсэн жуух бичгийг нь өгөхгүй Монгол Улсын Ерөнхийлөгч “өөрийн” хүнээ оронд нь явуулахаар зэхэж байгаа талаар яригдах болсон. Харин БНСУ-д суух Элчин сайд Б.Хурцын асуудал өнөөдрийг хүртэл тодорхойгүй байсаар байна. Томилогдох Элчин сайдуудаа үдэх, улс хоорондын хамтын ажиллагааны олон асуудал хүлээгдэж байгааг эрхэм Ерөнхийлөгчид сануулахад илүүдэхгүй биз ээ.

H2 визний хөтөлбөрт зуучлах Монгол компани байхгүй

АНУ-ын Дотоодын аюулгүй байдлын яам 2018 оны нэгдүгээр сарын 18-ны өдөр тус улсад H-2 ангиллын визээр иргэд нь нэвтрэх эрхтэй орнуудын жагсаалтад Монгол Улсыг шинээр нэмж оруулсан. Үүнтэй холбоотойгоор иргэдийн зүгээс H2  визээр АНУ-д ажиллах талаар тодорхой мэдээлэлгүй байгаа. Тэгвэл Гадаад харилцааны яамнаас богино хугацааны хөдөлмөр эрхлэх Н-2 визний хөтөлбөрт хамрагдах хүсэлтэй иргэдэд олон байгаа. Тэгвэл Гадаад харилцааны яамнаас өгсөн мэдээллээр, хөтөлбөр нь Монгол ажилчин авах хүсэлтэй АНУ-ын ажил олгогч компани байх тохиолдолд эрх бүхий компаниар дамжуулан бүртгүүлсэн иргэдийг хүлээн авч ажиллуулдаг зохицуулалттай тул Монголын эрх бүхий компаниуд АНУ-ын албан ёсны бүртгэлтэй зуучлагч компаниудтай гэрээ байгуулсны дараа иргэдийг хэрхэн бүртгэх, сонгон шалгаруулах асуудал шийдвэрлэгдэх юм байна.  Одоогоор АНУ-ын зуучлагчтай гэрээ хийсэн Н2 визэнд зуучлах эрхтэй Монгол компани байхгүй байгаа бөгөөд төрийн аль нэг байгууллага эсвэл Улаанбаатар дахь АНУ-ын ЭСЯ ямар нэг бүртгэл хийгээгүй аж. АНУ-д ажиллах иргэдийг бүртгэж байна, визэнд зуучилна гэх зэргээр залилангийн гэмт хэргийн шинжтэй зарлал, мэдээлэл олноор гарч байгаа тул та бүхнийг зөвхөн албан ёсны эх сурвалжаас мэдээлэл авахыг анхааруулжээ.

Төрийн өндөрлөгүүдийн айлчлалын бэлтгэл хангаж байна

Ирэх дөрөвдүгээр сараас эхлэн Төрийн өндөрлөгүүдийн айлчлал эхэлж буй. Үүнтэй холбогдуулан Гадаад харилцааны яам төрийн өндөрлөгүүдийн айлчлалыг хангах бэлтгэл хангаж байгаа юм байна. Монгол Улсын Ерөнхий сайд дөрөвдүгээр сарын 2-ний өдөр Катар улсад айлчлах сурагтай. Мөн түүний дараа Ерөнхий сайд БНХАУ-д айлчлах төлөвтэй байгаа юм. Тэгвэл Монгол Улсын Ерөнхийлөгч дөрөвдүгээр сард болох ШХАБ-ын уулзалтад оролцож магадгүй гэнэ. ШХАБ-ын уулзалт энэ жил Бээжинд болох юм.

Ш.ЧИМЭГ