Улаанбаатар хотод 142 гэрэл дохиог авто замын уулзвар болон явган зорчигчийн хөдөлгөөнийг зохицуулах зорилгоор ашиглаж байгаа. Гэхдээ автомашины тоо өсч, зам дээрх ачаалал улам нэмэгдсээр байгаа.  Тиймээс гэрлэн дохионы тоо ч нэмэгдэх нь ойлгомжтой юм.

Явган зорчигчид санаа амар зам хөндлөн гарна гэдэг жолооч нар түгжрэлгүй явахтай ижил бэрх болсон цаг.

Гэрлэн дохио  нь зарим үед  удаан асаж, эсрэг хөдөлгөөнөө хэт ачаалалд оруулдаг. Харин заримдаа хурдан асаж явган зорчигчийг зам хөндлөн гарч амжаагүй байхад нь унтарчихдаг. Ногоон гэрэл ассан ч гэрлэн дохио мөрддөггүй жолооч, машинуудтай нь амь өрсөн шахуу уралдах нь тун ярвигтай. Мөн цахилгаан тасармагц гэрэлгүй болчихдог гэхчлэн яриад байвал дуусахгүй олон асуудал бий. Энэ талаар Замын цагдаагийн газраас тодруулахад “Замын хөдөлгөөний удирдлагын  төвөөс гэрлэн дохионы зохицуулалтыг хийдэг. Замын эрчим ачааллаас хамаараад гэрлэн дохионы асаж, унтрах хугацаа нь өөр өөр байдаг” гэсэн хариултыг өглөө.

Харин замын хөдөлгөөний удирдлагын төвөөс гэрлэн дохиог хэрхэн зохицуулалт хийдэг талаар тодруулахыг хүссэн боловч үнэндээ  мэдээлэл өгөх хүн олдсонгүй. Тус газрын хэвлэлийн ажилтантай нь утсаар холбогдоход “Маргааш мэдээлэл өгье. Өнөөдөр завгүй байна” гэсэн юм.

Замын хөдөлгөөний удирдлагын төвийн цахим сайтаас авсан мэдээллээр авто  замын өргөн буюу явган хүний гарцны  урт 14 метр гэж бодоход явган зорчигчийн  хурдыг 1.2 м/ сек гэж үзээд  ногоон гэрлийн асаах хугацааг хамгийн багадаа 12 секундээр тооцож  асаадаг гэнэ. Явган зорчигчийн аюулгүй зам хөндлөн гарах нөхцөлийг хангах үүднээс ногоон гэрлийн асах хугацааг тухайн явган хүний гарцын урт буюу авто замын зорчих хэсгийн өргөн, тухайн гарцаар нэвтрэн өнгөрч буй явган зорчигчийн тоо зэргээс хамааруулан олон улсын стандартыг дагуу явган хүний алхааны хурдыг 1м/с-ээс 1,4м/с-ээр тооцоолон бодож өгдөг байна.  

Тиймээс гэрлэн дохиог нэг бол ойрхон ойрхон, хурдан давтамжтай асаах, эсвэл явган хүний гарцыг өөр аргаар шийдвэрлэх хэрэгтэй болж байна. Нэг гарцаас нөгөө гарцын хооронд зарим зам дээрх цагаан гарц хоёр км хүртэл байхад зарим нь маш ойрхон байж байх жишээтэй.  Явган хүний энгийн алхалтаар гэрлэн дохиогоо тааруулах шаардлагатай юу. Гэхдээ автомашин нь багталцаж ядаж байхад аль болох хүнээ хурдан гаргах хэрэг бас гарна. Харин үүнийг шийдсэн томоохон уулзваруудын дээгүүр явах гүүрэн гарц бий. Магадгүй гүүрэн гарц ахмад настнууд болон хүүхдүүдэд тийм ч таатай бус. Ихэнхдээ маш өндөр эвгүй шаттай бас лифт нь ажиллахгүй байх нь элбэг. Авто зам дээрх гэрлэн дохиог сайжруулах, олон улсын стандартад хүргэх, ажлуудыг хиймээр байна.