Нийслэлийн мэргэжлийн хяналтын газраас өнөөдөр /2018.03.21/ эмчилгээний гоо сайхны мэс ажилбар, мэс заслын тусламж үзүүлдэг эмнэлгүүдэд хяналт шалгалт хийсэн үр дүнгийн талаар хэвлэлийн хурал хийлээ.
Шалгалтаар арьс эмчилгээний гоо сайхан, мэс ажилбар, мэс заслын чиглэлээр үйл ажиллагаа явуулж буй нийт 56 эмнэлэг хамрагджээ.
Эдгээр байгууллагууд нь хувийн хэвшлийн эмнэлгүүд байсан аж. Мөн гаднын эмч мэргэжилтнүүд аялал жуулчлалын визээр орж ирэн эмчлэх эрхийн зөвшөөрөлгүйгээр үйлчилгээ үзүүлсэн, эм эмнэлгийн хэрэгслүүдийг өөрсдөө ганзагаар оруулж ирсэн зэрэг нийтлэг зөрчлүүд илэрчээ.
Шалгалтад хамрагдсан эмнэлгүүдийн долоон хувь нь буюу 16.4 хувь нь эмнэлгийн зориулалтын бус байранд үйл ажиллагаа явуулж байсан. Мөн багаж материалын ариутгалыг өөрийн байрандаа хийдэг найман эмнэлгийн ариутгалын хэсэгт стандартын шаардлагад нийцэхгүй нь тогтоогджээ.
Энэ үеэр Нийслэлийн мэргэжлийн хяналтын газрын Эрүүл мэнд, боловсрол хяналтын хэлтсийн дарга Д.Цэнд-Аюуш “Арьс гоо заслын эмнэлгүүд нь Монгол Улсын эмийн бүртгэлд бүргэгдээгүй, бүртгэлийн загвараас зөрүүтэй ботокс эхэсийн тарилга зэргийг хууль бусаар импортлон хадгалалтын горим зөрчсөн нөхцөлд хэрэглэсэн тохиолдол цөөнгүй илэрсэн’ гэв
Шалгалтын явцад зөрчилд илэрсэн газруудад Зөрчлийн тухай хуулийн холбогдох заалтыг үндэслэн 16 аж ахуй нэгж гурван иргэнд нийт 21 сая 300 мянган төгрөгийн торгууль ногдуулж 750.000 төгрөгийн хууль бус орлого, 5.1 сая төгрөгийн нөхөн төлбөрийг барагдуулж таван эмнэлэгт холбогдох арга хэмжээг авч ажиллалаа.
“Alivemax” бол эм биш хүнсний нэмэлт бүтээгдэхүүн
Нийт хоёр байгууллагын үйл ажиллагааг хэсэгчлэн зогсоох тухай саналыг Хан-Уул дүүргийн прокурорын газарт хүргүүлсэн.
Хоёрдугаарт хэвлэл мэдээллийн хэрэгслүүдээр хүнсний нэмэлт бүтээгдэхүүн эм мэтээр сурталчилж ард иргэдийг төөрөгдүүлж буй “Alivemax” нэртэй бүтээгдэхүүн байгаа. Энэ бүтээгдэхүүнийг иргэдээс гомдол ирүүлсний дагуу шалгасан. Энэ бол хүнсний нэмэлт бүтээгдэхүүн юм. Биологийн нэмэлт бүтээгдэхүүн буюу эм биш юм. Уг бүтээгдэхүүн нь хүнсний бүтээгдэхүүний ангилалд орж байгаа гэдгийг Эрүүл мэндийн яам, Нийслэлийн эрүүл мэндийн үндэсний төвөөс тодорхойлсон. Гэтэл олон нийтийн мэдээллийн хэрэгслээр эмтэй харьцуулж үр дүнг нь сурталчилж байгаа. Мөн Шударга өрсөлдөөн хэрэглэгчийн төлөө газраас шалгалт хийж тухайн газарт арга хэмжээ авч авч ажилласан.
Иймд иргэд та бүхэн эмчилгээний гоо сайхны газруудад үйлчлүүлэхдээ сонголтоо зөв хийж, арьс гоо заслаар мэргэшсэн эмнэлгийн боловсон хүчнээр хангагдсан газарт үйлчлүүлэхийг анхааруулж байна” гэж мэдээллээ.
