Замын цагдаагийн албанаас өнөөдөр /2018.03.20/ цаг үеийн асуудлаар мэдээлэл хийлээ. Энэ үеэр Замын цагдаагийн албаны урьдчилан сэргийлэх хэлтсийн ахлах мэргэжилтэн Б.Лхагважаргал дараах мэдээллийг өгөв.

Ачааны авто машинд тавих хяналт шалгалтыг эрчимжүүлэв

Урин дулаан цаг эхэлж хөрсний гэсэлтийн улмаас авто зам эвдэрдэг Иймээс авто замын бүрэн бүтэн байдлыг хамгаалах зорилгоор тухайн авто замын зөвшөөрөгдөх даацын үзүүлэлтээс хэтэрсэн буюу авто тээврийн хэрэгслийн техникийн байдалд тавих ерөнхий шаардлагыг зөрчсөн даацтай тээврийн хэрэгслийг хатуу хучилттай замаар зорчуулахгүй, хязгаарладаг.

Энэ ажлын хүрээнд аймаг, дүүргийн Мэргэжлийн хяналтын алба, Авто тээврийн үндэсний төвийн салбар, Автозамын асуудал хариуцсан аж ахуй нэгжүүдтэй хамтран энэ сарын 20-с эхлэн  нэг сарын хугацаанд хяналт, шалгалтын ажлыг зохион байгуулж байна.

Нэгдүгээр эгнээгээр явж буй тээврийн хэрэгслүүдийг гэрэл зургаар баталгаажуулж байна

Нийтийн тээврийн хэрэгслийг нэгдүгээр эгнээгээр чөлөөтэй зорчих боломжийг бүрдүүлэх зорилгоор энэхүү арга хэмжээг зохион байгуулж байна. Ингэхдээ нийтийн тээврийн хяналтын улсын байцаагч нар автобусны буудал дах нэгдүгээр эгнээнд явж буй авто машины зөрчлийг гэрэл зургаар баталгаажуулж байгаа юм.

Хэрэв зөрчил ирүүлсэн тохиолдолд цагдаагийн байгууллага шалгана. Түүнээс зураг бүрт нь торгууль ногдуулна гэсэн зүйл байхгүй. Зөвхөн гаргасан зөрчил нь тодорхой тохиолдолд торгууль оногдуулна. 

Байцаагч нар нэг газар удаан зогсолгүй хэсэгчлэн ажиллаж байгаа юм билээ. Нийтдээ төв замын есөн автобусны буудалд хяналт тавьж байна.

Э.Ариун