“Дүнжингарав 2018” төвийн бүсийн хаврын морин уралдааныг оройн цагаар зохион байгуулснаас болж, унаач хүүхдүүд бэртэж гэмтсэн ноцтой асуудал үүсээд байгаа.

Энэ асуудалтай холбогдуулж Ерөнхий сайд У.Хүрэлсүх Шадар сайд Ө.Энхтүвшинд үүрэг өгчээ. Тодруулбал, ‘Дүнжингарав 2018’ морин уралдааныг зохион байгуулах үеэр гарсан зөрчил дутагдалд яаралтай дүгнэлт хийж, хууль болон Засгийн газрын тогтоол зөрчигдсөн бол холбогдох хүмүүст хариуцлага тооцохыг үүрэг болгосон байна. Мөн бэртэж гэмтсэн хүүхдүүдэд шаардлагатай эмчилгээг яаралтай хийхийг даалгасан байна.

Морин уралдаан нь өнгөрсөн ням гаригт (2018.03.20) Говьсүмбэр аймгийн Баянтал суманд зохион байгуулагдсан юм. Зохион байгуулалт тааруу байснаас 16 хүүхэд мориноос унасан. Тэднээс гурван хүүхэд хүнд бэртэл авсан.

Мөн Засгийн газрын тогтоолоор 12 наснаас дээш хүүхдийг хурдан морь унуулахаар заасан атал Төв аймгийн уяач 11 настай хүүхдээр морь унуулж, уралдуулан, бэртээсэн болохыг Гэр бүл хүүхэд залуучуудын хөгжлийн газраас мэдээлээд байгаа.

Хаврын бүсийн морин уралдааныг Морин спорт уяачдын холбооноос зохион байгуулсан юм. 

Г.ХОРОЛ