Хичээлдээ явахаар такси бариад явсан 13 настай охин нийслэлээс алга болсон гэх дуудлага өнгөрсөн долоо хоногт цагдаагийн байгууллагад ирсэн. Уг дуудлагын дагуу цагдаа нэр шуурхай ажиллаж, охиныг найзындаа байхад нь олсон байна. Тиймээс цагдаагийн байгууллагаас эцэг, эхчүүдийг үр хүүхдэдээ тавих хараа хяналтаа сайжруулахыг анхааруулсан. Тэгвэл өнгөрсөн бямба гаригт Дорнод аймгийн цагдаагийн газрын жижүүрийн шуурхай албанд Хэрлэн сумын 4 дүгээр багийн оршин суугч Т хандаж “Есөн настай миний зээ охин Ж нь баасан гаригийн орой 17 цагийн орчимд хичээлээ тараад одоог хүртэл гэртээ ирэхгүй, хаана байгаа нь мэдэгдэхгүй байна” гэсэн дуудлага өгсөн байна. Уг дуудлагын дагуу охиныг 24 цагийн дотор шуурхай олжээ. Охин найзынхаа гэрээс гараад явж байхад нь цагдаа нар олсон байна.

Яагаад чимээгүй нэг хоногоор алга болсон талаар охиноос тодруулахад ‘Хичээлээ тараад гэр лүүгээ ганцаараа явсан. Гэрт хүн байхгүй, гэрийнхээ түлхүүрийг хайсан боловч олдоогүй. Тиймээс ангийн найз охиныдоо очиж хоносон. Найзынхаа болон ахынх нь гар утсаар эмээ рүүгээ залгахад утсаа авахгүй байсан’ гэсэн тайлбар өгсөн байна.

Эцэг эхчүүд та бүхэн насанд хүрээгүй хүмүүст тавих анхаарлаа сайжруулж, хүүхдүүд гэртээ хонохгүй тохиолдолд заавал эцэг эхдээ мэдэгдэж байхыг цагдаагийн байгууллагаас сэрэмжлүүлж байна.

Эх сурвалж: ЦАГДААГИЙН ЕРӨНХИЙ ГАЗАР