ОХУ-ын ерөнхийлөгчийн сонгуульд үнэмлэхүй ялалт байгуулж, дахин зургаан жил бүрэн эрх хэрэгжүүлэх болсон Владимир Путинд Хятадын дарга Ши Жиньпин, Венесуэлийн Ерөнхийлөгч Николас Мадуро, Боливын Ерөнхийлөгч Эво Моралес нар баяр хүргэсэн байна.
ОХУ-ын ерөнхий сайд, ерөнхийлөгчийн албыг сүүлийн 20 шахам жил ээлжлэн хашиж буй Владимир Путин энэ сонгуулийн урьдчилсан дүнгээр 76.67 хувийн санал авч, хувийн дээд амжилт тогтоосон ч насаараа энэ суудалд суухгүй хэмээн мэдэгджээ.
Сөрөг хүчний намуудаас сонгогчдын саналыг луйвардсан гэх гомдол ирсээр байгаа ажээ.
2024 он хүртэл ерөнхийлөгчийн бүрэн эрх хэрэгжүүлэх нь тодорхой болсон Владимир Путин Йосиф Сталинаас хойш хамгийн удаан төр барьсан удирдагч болж байгаа юм.
Путин энэ сонгуульд долоон нэр дэвшигчтэй өрсөлдсөн боловч түүнийг хамгийн их шүүмжлэгч сөрөг хүчний лидер Алексей Навальный хууль зөрчсөн гэх шалтгаанаар сонгуульд өрсөлдөх эрхээ хасуулсан билээ.
Сонгуулийн штабуудад Путины ялалтыг тэмдэглэн сельфи уралдаан, хоолны фестивалиуд болж байгаа гэнэ.
Сонгуулийн ирц сайн байсан нь улсын үйлдвэр, компаниудын ажилтнуудыг сонгуульд заавал санал өгөхийг удирдлагууд шаардсантай холбоотой ажээ.
ОХУ-ын Сонгуулийн ерөнхий хорооноос хамгийн сүүлд мэдээлснээр нийт саналын 99.8 хувийг тоолж дууссан бөгөөд урьдчилсан дүнгээр Путин 76.67 хувийн саналаар тэргүүлж, Коммунист намын нэр дэвшигч Павел Грудин 11.79 хувийн саналаар удаалж байгаа гэнэ.
Харин хэт үндсэрхэг үзэлт нэр дэвшигч Владимир Жириновский 5.66 хувь, реалити телевизийн хөтлөгч асан Ксения Собчак 1.67 хувь, либерал улс төрч Григорий Явлинский нэг хувийн санал авсан байна.
Эх сурвалж: Agence France –Presse
