Эр цэргийн баярт “Дон Кихот” балетыг зориулав | News.MN

Эр цэргийн баярт “Дон Кихот” балетыг зориулав

Хуучирсан мэдээ: 2018.03.16-нд нийтлэгдсэн

Эр цэргийн баярт “Дон Кихот” балетыг зориулав

Эр цэргийн баярт “Дон Кихот” балетыг зориулав

Улсын дуурь бүжгийн эрдмийн театрын хамт олон цэрэг эрсийн баярыг тохиолдуулан энэ амралтын өдүүдэд хөгжмийн зохиолч Л. Минкусийн “Дон Кихот” балетыг тоглох гэж байна.

Нэгэн хайрын түүхийг илэрхийлсэн энэхүү балет сонгодог бүжгэн жүжгүүдийн дундаас бүжигчдийн ур чадварыг дээшлүүлдэг цөөн бүтээлийн нэг юм.

Хөгжмийн зохиолч Л.Минкус амьдралынхаа туршид 16 балетийн хөгжим бичсэнээс утга санаа, үйл явдлыг илэрхийлэх байдлаараа “Дон Кихот” онцгой хэмээн мэргэжилтнүүд дүгнэсэн байдаг.

Испанийн алдарт зохиолч Сервантесийн “Дон Кихот” зохиолыг анх 1743 онд Францын Дуурь, бүжгийн театрт бүжгэн жүжиг болгон тоглосон аж. Дараа нь Л.Минкус бүжгэн жүжигт зориулсан хөгжим бичсэнээр 1869 оны арванхоёрдугаар сарын 14-нд “Дон Кихот” Москвагийн Их театрт нээлтээ хийж, сонгодгуудын сор болон тодорсон юм. Харин 1971 онд манай УДБЭТ-т Хөдөлмөрийн баатар, ардын жүжигчин Б.Жамъяндагвын найруулгаар тоглосон түүхтэй. Тухайн үед бүжгэн жүжгийн гол дүр болох Китрийн дүрд Ю.Цэрмаа, Базилийн дүрд О.Ганбаатар, Мерседесийн дүрд А.Навчаа нар бүжиглэжээ.

Бүжгэн жүжгийн гол баатар нь Дон Кихот мөн боловч тэрбээр бараг бүжиглэдэггүй. Тэрбээр зөвхөн зүүдэндээ л мөрөөдөлт бүсгүйтэйгээ бүжиглэдэг юм.

Энэ зохиолын гол дүр нь Китри, Базиль нар. Тэд бие биедээ хайртай. Гэвч Китрийн эцэг, гуанзны эзэн Лоренцо ядуу үсчин Базилийг охинтойгоо гэрлүүлэхийг огт хүсдэггүй. Тэр ч бүү хэл ихэмсэг тайж Гамашд Китрийг богтлон өгөхийг хүснэ. Азаар Дон Кихот энэ үед ирж Китр, Базиль нарыг гэрлүүлдэг. Энэ зохиолд эмгэнэлтэй, эсвэл ярвигтай үйл явдал нэг ч үгүй. Харин ч хөгжилтэй өрнөл, цоглог хэмнэлтэй бүжгээр сэтгэл эзэмдэнэ. Дон Кихотын зэвсэгч Санчо Пассо бол бүжгэн жүжгийн хамгийн хөгжилтэй дүрүүдийн нэг нь. Санчо талбайн голд бүжиглэх сайхан бүсгүйчүүдэд нүд унаган, хормойнд нь хүрч зүггүйтнэ. Хариуд нь бүсгүйчүүд түүнийг шоглон нүдийг нь боогоод тоглоом наадам болгон инээлдэнэ. Бүжгэн жүжгийн хоёрдугаар бүлгийн үйл явдал шар айрагны мухлагт өрнөдөг. Китри, Базиль нар энд уулзан, бүжиглэн хөгжилдөнө. Энэ үед үзэсгэлэнтэй бүжигчин Мерседес тоглолтоо сонирхуулдаг. Мерседес пасодобль бүжгийн аялгуунд бүжиж уран налархай хөдөлгөөний гайхамшгийг мэдрүүлж байлаа. Балет бүжиглэхийн тулд каски өмсөх учиртай ч Мерседесийн цыган маягийн бүжиг каскигүйгээр балетын шигтгээ болох нь сонин.

Энэ удаагийн гал цогтой испани бүсгүй Китрийн дүрийг үзэсгэлэнт хунгийн дүрээрээ үзэгчдийн сэтгэлд хоногшсон УДБЭТ-ын гоцлол балетчин СТА Б. Саруул, Япон улсын бүжигчин Н.Мако нар тоглох гэж байна.

Н.Мако нь тус балетын гол дүрд тоглох гэж байгаа шилдэг зочин бүжигчин юм. Тэрээр УДБЭТ-ын гоцлол бүжигчин СТА С.Эрдэнэболдтой хамтран тоглоно. Үсчин залуу Базильд театрын гоцлол бүжигчин Т. Хан-очир, СТА С.Эрдэнэболд бүжиглэх гэж байна.

Испанийн илэрхийлэл болдог бухтай тулалдагчийн дүрийг УДБЭТ-ын гоцлол балетчин СТА М.Од бүтээнэ.

Бухтай тулалдагчийн ширүүн харц, хөл хавсран алхах хөдөлгөөн зэрэг нь дүрээ илүү тодотгож өгдөг аж. Улаан нөмрөгт матадорыг харсан бухын нүд галзуурсан мэт гялалзаж, улаан тоос манаруулан түүнийг мөргөхөөр довтолдог бол “Дон Кихот” бүжгэн жүжгийн бүх үйл явдал, жүжигчдийн тоглолт бухын улаан нүдийг санагдуулам эрч хүчтэй, тод илэрхийлэлтэй байдаг юм.

Ийнхүү цоглог, эрэлхэг хөгжилтэй хөдөлгөөний илэрхийлэл болсон гайхалтай бүтээлийг “Эр цэргийн баяр”-ийн өдөрт зориулан өнөөдөр, маргааш УДБЭТ-ын уран бүтээлчид хүргэх гэж байна.

 

1 Сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2018-03-16 73.93.152.100

Battulaga aa Er tsergiin bayr gej baihaa zugeer l Erchuudiin bayr bologchooch ee

NewsMN Гар утасны хувилбар Татах
NEWS.mn

Мэдээллийн эх сурвалж