Баялгийн засаглал: Геологи, хайгуул | News.MN

Баялгийн засаглал: Геологи, хайгуул

Хуучирсан мэдээ: 2018.03.16-нд нийтлэгдсэн

Баялгийн засаглал: Геологи, хайгуул

Баялгийн засаглал: Геологи, хайгуул

Монгол Улсын Ерөнхийлөгчийн Тамгын Газар, “Хөгжил-ардчилал” ТББ байгууллага, Конрад Аденауэрийн сантай хамтран зохион байгуулсан “Баялгийн засаглал” хэлэлцүүлэг өнгөрсөн долоо хоногт лицензийн  хууль эрх зүйн асуудлыг нарийвчлан ярилцсан бол энэ удаа “Баялгийн геологи, хайгуул” сэдвээр нээлттэй ярилцлаа.

Энэ удаагийн хэлэлцүүлэгт Монгол улсад идэвхтэй үйл ажиллагаа явуулж буй геологийн холбоод, томоохон уул уурхайн компаниудын төлөөлөл, МУИС, ШУТИС-ын эрдэмтэд багш нар болон уурхайчид гээд өргөн бүрэлдэхүүнтэй боллоо.

Хэлэлцүүлгийн эхэнд “Монголын үйлдвэрлэгчдийн геологийн холбоо”-ны тэргүүн Д.Бат-Эрдэнэ “Геологи судалгааны ажил өнөөдөр – маргааш” сэдвээр илтгэл тавьж оролцогчидын асуултад хариулт өгсөн юм. Тэрээр илтгэлдээ өнөөдөр Монгол улсын нутаг дэвсгэрт улсын төсвийн хөрөнгөөр санхүүжиж буй 42 төсөл хэрэгжиж байгааг дурдаад улс төрчид, популист хөдөлгөөнүүдийн хууль бус нөлөөлөл, орон нутгийн удирдлага, иргэдийн эсэргүүцлээс шалтгаалан ААН-үүд тухайн жилд гүйцэтгэхээр төлөвлөсөн хайгуулын ажилд цөөнгүй хүндрэл бэрхшээл гардгийг дурдсан юм. Мөн хайгуулын тусгай зөвшөөрөл эзэмшигч компаниуд АМТХ-ийн тайлан өгөх, хайгуулын ажлын зардлын доод хэмжээнээс багагүй хэмжээний хайгуулын ажлыг жил бүр гүйцэтгэнэ гэсэн заалтыг биелүүлэх боломжгүй болж лиценз цуцлагдах нөхцөл бүрддэг зэрэг хүчин зүйлсийг дурдсан юм. Тэрээр хайгуулын ажлын үр дүнгийн тайлантай холбоотойгоор батлагдсан журам, заавар, маягтын дагуу хийхгүй, дутуу хийх, нөөцийн зэрэгт тавигдах шаардлагыг хангахгүй, ажлууд буруу, дутуу хийгдэх, тайланд шүүмж хийж буй шинжээч нар шаардлага хангах хэмжээнд хянахгүй байх, үнэлгээ, дүгнэлт гаргах бүрэн дүүрэн үүргээ биелүүлэхгүй, хянаж буй мэргэжилтний мэдлэг чадвар, туршлага зарим нөхцөлд дутмаг байдлыг ч ярьж байлаа. Түүнчлэн буруу хуулийн нөлөөллөөс үүдэн алт олборлолт, тушаалт гажуудах зэрэг бэрхшээлүүд ч хэлэлцүүлгийн үеэр яригдсан.  Цаашлаад улсын геологийн алба байгуулж хуульд заасан үйл ажиллагаа гүйцэтгэх, хууль санаачлах, өөрчлөх, ЗГ-ын чухал шийдвэр гаргахад салбарын бүх оролцогч талуудыг оролцуулж, саналын сонсож шийдвэр гаргаж байх тал дээр анхаарах хэрэгтэй зэрэг олон талт сэдвээр нээлттэй ярилцлаа. “Баялгийн засаглал” хэлэлцүүлэг 3-р сарын 21-ны лхагва гарагт “Баялгийн олборлолт” сэдвээр үргэлжилнэ.

Б.БАТ

0 сэтгэгдэл

News.mn сайтад сэтгэгдэл оруулахад анхаарах зүйлс

NewsMN Гар утасны хувилбар Татах
NEWS.mn

Мэдээллийн эх сурвалж