Монгол улсын гавьяат тамирчин, “Seven summit”-ын эзэн, уулын спортын ОУХМ Б.Гангаамаа дэлхийн долоон тивийн долоо дахь ноён оргилд төрийн далбаагаа мандуулсан туршлагатай уулчин билээ.

Тэгвэл уулчин бүсгүй дараагийн аялалд гарахаар бэлтгэж эхэлжээ. Тэрбээр ирэх зургадугаар сард дэлхийн хоёр дахь ноён оргил K2 уулын авиралтыг энэ удаа сонгосон байна. Туршлагатай уулчин маань энэхүү авиралтанд 2014 оноос хойш бэлдэж, төлөвлөж эхэлжээ. Тиймээс ирэх зургадугаар сарын 15-аас наймдугаар сарын 15-ны хооронд хийгдэх олон улсын авиралтын бэлтгэлээ эрчимжүүлэх болсноо өнөөдөр өөрийн фэйсбүүк хуудсаар дамжуулан мэдэгдлээ.

Пакистаны нутаг дэвсгэр, Каракарум нуруунд орших К2 оргилыг уулчид “Алуурчин” уул гэдэг. Догшин, сүрлэг энэ оргил Хятад, Пакистаны хилийн заагт, далайн төвшнөөс дээш 8611 метрийн өндөрт оршино. К2 уулын авиралт дэлхийн хамгийн хүнд 10 авиралтын нэгдүгээрт бичигддэг байна. Энэ уул дэлхийн уулчдын авирахыг хүсдэг уулын нэг боловч хамгийн их эрсдэлтэй гэдгийг олон улсын шинжээчид тогтоосон.

Гэхдээ Б.Гангаамаа К2 ууланд 2013 оны наймдугаар сард гарахыг зорьсон ч буцсан билээ. Тухайн үед 67 уулчин анх авиралтыг эхлүүлсэн ч долоо нь оргилд гарсан. Уулчдын тэсвэр хатуужил, тэвчээрийг дээд зэргээр шалгадаг энэхүү авиралтын үеэр 22 уулчин амиа алдаж байсан харамсалтай хэрэг болж байлаа. Тиймээс К2 уулыг ‘алуурчин’ уул гэж хэдийнэ нэрлээд эхэлжээ. К2 уулын оргил дээр үлдсэн нэг ч юм тогтдоггүй бөгөөд бүгд доош унадаг тийм эгц уул аж.

Энэхүү авиралтаас хойш тэрбээр “Seven summit”-ыг ийн гүйцээх хүсэл мөрөөдлөө гүйцээж, үүнийг биелүүлж чадсан билээ.

Б.Гангаамаа дэлхийн дээвэр Эверестийн ноён оргилд эх орныхоо соёмбот тугийг мандуулсан анхны монгол эмэгтэй уулчин болсон түүхийг 2011 онд бичиж байсан. Тэгвэл тэр цагаас хойш уулчин бүрийн хүсдэг “Seven summit”-ыг эзлэх мөрөөдөлдөө зүтгэсээр 2016 онд гүйцээж чадсан. Түүний энэхүү амжилт монгол хүн “Seven summit”-г гүйцээсэн анхны тохиолдол болж, дэлхийн уулын түүхийн хуудсанд Монголын нэр бичигдэх болсон түүхийг 2016 онд бичсэн юм. 

Б.Гангаамаа “Seven summit”:

• 2010 онд Европ тивийн ноён оргил Эльбрус /5642 м/
• 2011 онд Ази тивийн ноён оргил Эверест /8848 м/
• 2012 онд Африк тивийн ноён оргил Килиманжаро /5895 м/
• 2015 онд Хойд Америкийн ноён оргил Денали /6194 м/
• 2016 онд Өмнөд Америк тивийн ноён оргил Аконкагуа /6962 м/
• 2016 онд Австрали ба Далайн ноён оргил Карстенз пирамид /4 884 м/
• 2016 онд Антарктид тивийн ноён оргил Винсон массивд /4897 метр/ хөл тавьж, Монголынхоо далбааг мандуулсан түүхэн амжилтын эзэн боллоо.

Гавьяат тамирчин, “Seven summit”-ын эзэн, уулын спортын ОУХМ Б.Гангаамаа http://www.gangaamaa-expeditions.com сайтыг нээн ажиллуулж байгааг энэ дашрамд дуулгаж байна.