Монгол цэргийн өдөр, зэвсэгт хүчний 97 жилийн ойн мэндчилгээ | News.MN

Монгол цэргийн өдөр, зэвсэгт хүчний 97 жилийн ойн мэндчилгээ

Хуучирсан мэдээ: 2018.03.16-нд нийтлэгдсэн

Монгол цэргийн өдөр, зэвсэгт хүчний 97 жилийн ойн мэндчилгээ

Монгол цэргийн өдөр, зэвсэгт хүчний 97 жилийн ойн мэндчилгээ

Эх орныхоо тусгаар тогтнол, эрх чөлөөний төлөөх эрхэм үйл хэрэгт халуун амь, бүлээн цусаа зориулсан баатарлаг эр цэргүүд, өнөө цагт Монгол Улсынхаа энхийн манаанд төдийгүй шинэ үеийн бүтээн байгуулалтад оролцож, дэлхий дахинд энх тайвныг тогтооход ч хүчин зүтгэж байгаа эр цэргүүддээ “Монгол цэргийн өдөр, Зэвсэгт хүчний 97 жилийн ойн баяр”-ын мэндийг Нийслэлийн удирдлагын зүгээс өргөн дэвшүүлж байна.

Төрийн далбаандаа бөхийж, түмэн олон эх орондоо өргөсөн тангарагтаа үеийн үед үнэнч зүтгэж ирсэн Монгол цэргүүдийнхээ баатарлаг үйлсийг дурсах, гэгээн дурсгалыг хүндэтгэх, тэдний үйл хэргийг залгамжлан үргэлжлүүлж, залуу хойч үедээ үлгэр дууриал болгох зорилгоор “Монгол цэргийн өдөр”-ийг тэмдэглэж ирсэн түүхтэй билээ.

Батлан хамгаалах бодлого бол улс орны үндэсний аюулгүй байдлын баталгаа, дархлаа юм. Энэ ч утгаараа нийслэлийн нутгийн захиргааны байгууллагаас батлан хамгаалах салбартай нягт хамтран ажиллаж, залуусаа эх оронч хүмүүжлээр төлөвшүүлэх, батлан хамгаалах салбарын хуулийг иргэддээ сурталчлах, энх цагийн бүтээн байгуулалтад эр цэргүүдийнхээ үүрэг оролцоог нэмэгдүүлэх ажлуудыг тогтмол хийж ирсэн.

Түүнчлэн Нийслэлийн нутгийн захиргааны байгууллагаас 2018 оныг “Иргэдийн оролцоотой амьдрах орчныг сайжруулах жил” болгох зорилтыг дэвшүүлэн ажиллаж байна. Энэ зорилтын хүрээнд нэн тэргүүнд Батлан хамгаалах яам, Зэвсэгт хүчний Жанжин штаб дэмжиж, Улаанбаатар цэргийн хүрээний анги, байгууллагуудын орчныг сайжруулахад хамтран ажиллаж байгаад гүн талархалтай байна.

Монгол цэргийн эрдэм чадвар, эв нэгдлийг даян дэлхийд дуурсган байхын өлзийтэй ерөөлийг Та бүхэндээ дахин дэвшүүлье.

Монгол цэргийн хийморь үеийн үед мандан бадарч, Улаанбаатар хот маань хөгжин дэвжих болтугай.

НИЙСЛЭЛИЙН ИРГЭДИЙН ТӨЛӨӨЛӨГЧДИЙН
ХУРЛЫН ДАРГА С.АМАРСАЙХАН

НИЙСЛЭЛИЙН ЗАСАГ ДАРГА БӨГӨӨД
УЛААНБААТАР ХОТЫН ЗАХИРАГЧ С.БАТБОЛД

2 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2018-03-16 202.21.106.156

1921 оны 3-р сарын 18 нд Хиагтад коминтернийхэн яаран сандран хурал цуглаан маягийн юм зохион байгуулсан өдрийг Монголын зэвсэгт хүчний ойн өдөр болгон тэмдэглэх нь буруу. Тэр өдрийн хуралдаанд 20-30-н хэдэн хүн оролсоноос ердөө л 6-7 хүн нь л Монголын харьяат хүмүүс байсан гэдэг. 1921 оны 3-сарын эхээр цагаантан Барон Унгерн Хүрээг чөлөөлсөнд түгшсэн коминтернийхэн ийнхүү яаруу сандруу хуралдаан зохион байгуулж, Хүрээнд албан ёсны Богдын засгийн газар байсаар байтал, зэрэгцүүлэн, бас нэг тоглоомын засгийн газар байгуулжээ. Цэргийн яамны сайдаар нь тухайн үед Эрхүүд цэргийн сургуульд сурч байсан Д.Сүхийг томилов. Тэгэхлээр Оросын харьяат коминтернийхэний зохион байгуулсан хуралдаанаар, мөн тэдний байгуулсан тоглоомын ЗГ-т, коминтернийхэний томилсон сайдууд тухайн үедээ бол хууль бус сайдууд байсан юм.

Avatar

Монголхүү 2018-03-16 88.230.3.128

Монголын Зэвсэгт хүчин 97-хон жил болж байгаа юм уу??? Чингис хааны цэрэг монгол биш үү??? Хүннүгийн цэрэг бас монгол биш үү???

NewsMN Гар утасны хувилбар Татах
NEWS.mn

Мэдээллийн эх сурвалж