Улсын Их Хурлын Тамгын газрын Ерөнхий нарийн бичгийн дарга Ц.Цолмон болон Тамгын газрын удирдлагууд өнөөдөр (2018.03.15) Улсын Их Хурлын Тамгын газрын ахмад настан О.Тунгалагт 60 насных нь ойг тохиолдуулан хүлээн авч, хүндэтгэл үзүүлэв.

Энэ үеэр Улсын Их Хурлын Тамгын газрын Ерөнхий нарийн бичгийн дарга Ц.Цолмон ахмад настан О.Тунгалагт баяр хүргэж, эрүүл энхийг хүслээ. О.Тунгалаг нь 1982 оноос төрийн захиргааны байгууллагад ажил, хөдөлмөрийн гараагаа эхэлж байсан бол УИХ-ын Тамгын газарт 2005 оноос Төрийн байгуулалтын байнгын хороонд ажилласан. Тэрээр ажиллах хугацаандаа Монгол Улсын Их Хурлын сонгуулийн тухай хууль, Орон нутгийн хурлын сонгуулийн тухай хууль, Төрийн албаны тухай хууль зэрэг төрийн албыг бэхжүүлэх чиглэлээр ажиллаж байсан туршлагатай хуульчдын нэг юм.

Улсын Их Хурлын даргын 30 дугаар захирамжаар баталсан /Ахмадын сан байгуулан ажиллуулах журам батлах тухай/ Ахмадын сангийн дүрэмд УИХ-ын Тамгын газрын ахмад настнуудын ойг тэмдэглэн, баяр хүргэж, хүндэтгэл үзүүлж байхаар заажээ. Энэ хуулийн зорилт нь ахмад настны эрхийг хангах, амьжиргаа, хөгжил, оролцоог дэмжих, нийгмийн үйлчилгээ авах боломжийг нэмэгдүүлэх, төрийн болон аж ахуйн нэгж, байгууллагын үүргийг тодорхойлж, тэдгээрийн үйл ажиллагааны эрх зүйн үндсийг тогтооход оршино гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.