Доктор Г.Пүрэвдорж сартуул овгийнхны угсаа, нутаг усны нэршлийн тухай өгүүлэх “Сарт гол цэцэн вангийн шастир оршвой” бүтээлээ Архивын ерөнхий газарт (АЕГ) өнөөдөр /2018.3.12/ хүлээлгэн өглөө. Түүнчлэн номыг дагалдуулан Сартуул овгийнхны ургийн бичиг, 1929 оны хүн амын тооллого зэргийг кирил бичгээр хөрвүүлсэн хувилбарыг АЕГ-т хадгалуулсан юм.

Ургийн бичгийн хувьд 32 метр, 4000 гаруй хүний нэр бичигдсэн байдаг бөгөөд эх хувь нь Архивын ерөнхий газар хадгалагддаг юм байна. Үүнийг кирил бичгээр хөрвүүлэн АЕГ-т хүлээлгэн өгч байгаа нь АЕГ-ынхны анхаарлыг татаж байлаа.

Доктор Г.Пүрэвдоржийн хувьд Сартуул овгийнхны талаарх судалгааны бүтээлд таван жил зарцуулжээ.

АЕГ-ын дарга Д.Хоролдамба түүний хөдөлмөрийг өндрөөр үнэлж буйгаа илэрхийлээд “Эрдэм шинжилгээний эргэлтэд илүү хурдтай оролцох боломж нээгдлээ” гэсэн юм.

Р.Ренчиндулам