Эмэгтэй гишүүд ингэж ярив

Хуучирсан мэдээ: 2018.03.09-нд нийтлэгдсэн

Эмэгтэй гишүүд ингэж ярив

Эмэгтэй гишүүд ингэж ярив

Өчигдөр буюу гуравдугаар сарын 8-нд Олон улсын эмэгтэйчүүдийн эрхийг хамгаалах өдөр тохиов. Энэ өдөрт зориулж УИХ-ын эмэгтэй гишүүд дараах байр суурийг илэрхийлсэн юм.  

УИХ-ЫН ГИШҮҮН М.ОЮУНЧИМЭГ:

УИХ-ЫН ГИШҮҮН М.ОЮУНЧИМЭГ:

-Биднийг багад Мартын 8-ны баярыг тэмдэглэхэд нэлээд ач холбогдол өгдөг байсан. Аав “Өнөөдөр ядаж ганц өдөр ээжийг чинь гэрийн ажилд гар хүргэхгүй шүү” гээд хоол унд хийж өгч, гэр цэвэрлэхээс эхлээд бүхий л ажлаас ээжийг чөлөөлнө. Үүнийг хараад “Ямар сайхан баяр вэ” гэж боддог байлаа. Одоо манайхан Монита зарлаад байгаа болохоос биш сургууль дээрээ очиход ангийн хөвгүүд үзэг, харандаа, дэвтэр өгөх ч юм байдаг юм уу одоо эргээд бодоход хөөрхөн л тэмдэглэдэг байж. Би ОХУ-ын Ленинград хотод оюутан байлаа. Мартын 8-ны баярыг оросууд жинхэнэ утгаар нь тэмдэглэдэг байсан юм. Хэдийгээр баярын өдөр ч гэсэн эмэгтэйчүүд эрхээ хамгаалсан, би эмэгтэй хүн, ямар үнэ цэнтэй вэ гэдгээ мэдэрсэн тэр цаг үе оюутан цаг байсан. Эмэгтэй хүн хүнд ойлгогдох гэж биш хайрлагдах гэж байдаг юм байна гэж бодох болсон. Мартын 8-ны энэ өдөр би ээжийгээ, эгч нараа хайрлах агуу хайрын баяр юм байна гэж ойлгодог. Энэ л өдөр ээждээ баглаа цэцэг, бялуу аваад очиход жигтэйхэн баярладаг байсан юм. Ноднин ээж минь бурхны оронд заларсан болохоор одоо бол миний сэтгэл жаахан гунигтай л байна. Гэхдээ ээж минь тэнгэрийн орноос охиноо хараад түмэн олныхоо төлөө яваа юм байна, эх орныхоо хөгжлийн төлөө зүтгэж байгаа юм байна гээд баярлаж байгаа байх. Монгол Улсын хүн амын 51.7 хувь нь эмэгтэйчүүд байна. Энэ маш чухал тоо. Судалгаанаас харахад эмэгтэйчүүдийн боловсролын түвшин, ажлын гүйцэтгэлийг харахад маш өндөр байгаа юм. Тийм учраас эмэгтэйчүүдийнхээ оролцоог нэмэгдүүлэх, тэдний нөөц боломжийг ашиглах хэрэгтэй.

УИХ-ЫН ГИШҮҮН Б.УНДАРМАА:

УИХ-ЫН ГИШҮҮН Б.УНДАРМАА:

-Ертөнцийн амьдралын ундарга болсон та бүхэн урт наслаарай. Өнөөгийн монголын хөгжилд эмэгтэйчүүдийн манлайлал улам нэмэгдсээр байна. УИХ-ын 13 эмэгтэйг та нар минь үүрэг даалгавар өгч, сонгосон. Тэр утгаараа бид олон зүйл хийхийг хичээж байна. Жишээ нь, Ази номхон далайн бүсийн парламентын хуралд оролцож, алслагдсан орон нутгийн эмэгтэйчүүдийн нийгмийн байдлыг хангах зорилгоор сургалт хөтөлбөр тавьж, энэ тогтоолд оруулж чадсан. Мөн Жижиг дунд үйлдвэрийн хууль дээр ч эмэгтэй гишүүд санаачилгатай ажиллаж байна. 

УИХ-ЫН ГИШҮҮН Д.ОЮУНХОРОЛ:

УИХ-ЫН ГИШҮҮН Д.ОЮУНХОРОЛ:

-Үе үеийн эмэгтэй гишүүд гуравдугаар сарын 8-ны өдрийг ээжүүдтэйгээ тэмдэглэдэг. Монголын эмэгтэйчүүд идэвх санаачилгатай, хариуцлагатай, ар гэрийнхээ төдийгүй, нийгмийн амьдралд санаа тавьж засч залруулахын төлөө явдаг. Эмэгтэйчүүд бид туршлага чадвар сэтгэл зүтгэлээ эх орныхоо хөгжил цэцэглэлтэд харамгүй зориулахын зэрэгцээ үр хүүхдээ төрүүлэн эрүүл саруул өсгөн торниулж хүмүүжүүлэн боловсруулж удмын галыг таслалгүй авч явахад үнэлж баршгүй хувь нэмэр оруулдаг билээ. Өнөөдөр Монгол Улсын хүн ам 3,2 сая болсон гэж 2017 оны хүн амын тооллогоор гарсан. НҮБ-ын Эмэгтэйчүүдийн байгууллагаас санаачилсан эрчүүд эмэгтэйчүүдийнхээ төлөө аяныг Монгол Улсад эхлүүлэхээр бид хамтран ажиллаж байна. Энэ аяны хүрээнд эрийн ёсоор эмэгтэйчүүдээ хайрлахын нийт эрчүүддээ уриалж байна. 

ЭРҮҮЛ МЭНДИЙН САЙД Д.САРАНГЭРЭЛ: 

ЭРҮҮЛ МЭНДИЙН САЙД Д.САРАНГЭРЭЛ: 

-1857 оны гуравдугаар сарын 8-нд АНУ-ын Нью-Йорк хотноо эмэгтэйчүүдийн эрхийг хамгаалахаар нэгдэн боссон байдаг. Тэд цалингаа нэмэгдүүлэх, ажлынхаа нөхцөлийг сайжруулах шаардлага тавьсан. Тухайн үед эмэгтэйчүүд хамгийн олон цагаар ажилладаг ч хамгийн бага цалин авдаг байлаа. Дараа дараагийн жилүүдэд сонгуульд оролцох эрхийнхээ төлөө тэмцсэн байдаг. Өнөөдөр Монголын эмэгтэйчүүд та бид аль ч түвшний сонгуульд оролцох, ажил хөдөлмөр эрхлэх бүрэн эрх нээгдсэн. 2016 оны сонгуулиар парламентад хамгийн олон буюу 13 эмэгтэйг элч төлөөлөгчөө сонгосон. Бид та бүхний итгэлийг эрх мэдэл гэж хардаггүй. Биднээр дамжуулан эх орон, эмэгтэйчүүдийнхээ төлөө ажиллаж үүрэг өгсөн гэж хардаг учраас чармайж байгаа юм шүү. 

NewsMN Гар утасны хувилбар Татах
NEWS.mn

Мэдээллийн эх сурвалж