Хятадын Шинжинь хотноо дэлхийн оюутан залуусын зуны 26 дахь удаагийн “Универсиад” наадам дөрөв дэх өдрөө үргэлжилж байна. Бямба гаригт эхэлсэн жүдо бөхийн тэмцээн өнөөдөр эрэгтэйчүүдийн 60 кг, үнэмлэхүй жин болон эмэгтэйчүүдийн 48 кг, үнэмлэхүй жингийн барилдаанаар үргэлжилж байна. Тэгвэл, эрэгтэйчүүдийн 60 кг-д өрсөлдөж буй Монгол Улсын тамирчин О.Чинбат одоогоор мөнгөн медалийн болзол хангаж, Монголын баг тамирчдын медалийн буухиаг эхлүүлээд байна. Түүний жинд нийт 28 тамирчин өрсөлдсөн бөгөөд О.Чинбат эхний тойрогт Армяны тамирчинг, улмаар Нигери, БНАСАУ болон ОХУ-ын бөхчүүдийг ялснаар аваргын алтан медалийн төлөө БНСУ-ын бөх Ким Вон Жинтэй барилдахаар болоод байна.