Өрхийн орлого зарлагаа гүйцсэнгүй | News.MN

Өрхийн орлого зарлагаа гүйцсэнгүй

Хуучирсан мэдээ: 2018.03.06-нд нийтлэгдсэн

Өрхийн орлого зарлагаа гүйцсэнгүй

Өрхийн орлого зарлагаа гүйцсэнгүй

Иргэдэд хуримтлал үүсгэх боломж нэмэгдсэнгүй

Улсын дунджаар тооцвол өрхийн орлого 2017 онд 13.8 хувиар өсөж нэг сая төгрөгт хүрлээ. Өрхийн сарын дундаж мөнгөн орлого өсөхөд цалин хөлс 47 мянган төгрөг буюу 10.3 хувиар нэмэгдсэн, мөн хөдөө аж ахуйн үйлдвэрлэлийн орлого 28.4 мянган төгрөг буюу 46.6 хувиар өссөн нь голлон нөлөөлжээ. Нийслэлд амьдардаг өрхийн дундаж орлого 2017 онд 1,199,853 төгрөгт хүрсэн нь хамгийн өндөр үзүүлэлт. Харин төвийн бүсэд 1,039,907, баруун бүсэд 945,862, хангайн бүсэд 802,916 төгрөг байгаа бол зүүн аймгийн өрхүүдийнх 906,112 төгрөг байна. Өрхийн орлого ийнхүү бага ч гэсэн өсөх нь худалдааны салбар, цаашлаад улсын эдийн засагт нэмэртэй.

Гэвч орлогын энэ өсөлт зарлагаа гүйцэж чадахгүй, иргэдийн амьдралд бодит өгөөжөө өгөхгүй байна. Үндэсний статистикийн хорооноос явуулсан судалгаанд өнгөрсөн онд өрхийн зарлага ч мөн багагүй өссөнийг дурджээ. Нэг өрхийн сарын дундаж зарлага 1.1 сая төгрөгт хүрч, орлогоос 100 мянган төгрөгөөр илүү байна. Өрхүүдийн төсвийн дэвтэрт хасахаар тэмдэглэгдэх энэ дүн нь 2016 онтой харьцуулбал 15.3 хувь буюу 148.9 мянган төгрөгөөр ахисан үзүүлэлт юм. Задалж харвал, иргэдийн хүнсний бус бараа, үйлчилгээнд зарцуулах төсөв нь нэмэгдсэн байна. Нийт зардлын 2.6 хувийг бусдад өгсөн бэлэг, тусламж, 22.1 хувийг хүнсний бараа эзэлдэг. Харин үлдсэн 75.3 хувийг хүнсний бус бараа, үйлчилгээ, зээл, төлбөрт зарцуулж байгаа юм. Иргэд өнөөдрийн хэрэгцээгээ орлогоороо бүрэн хангаж чадахгүй байгаагаас өр, зээлийн хэмжээ нь ч өсөж, хуримтлал үүсгэх боломж ч хумигдмал хэвээр байна. Түүнчлэн манай улсын баян, ядуу өрхүүдийн хэрэглээний ялгаа зургаа дахин зөрүүтэй байгаа юм. Хамгийн ядуу өрх сард дунджаар 112.9 мянган төгрөг зарцуулж байгаа бол чинээлэг өрхүүдийн сарын хэрэглээ 658.5 мянган төгрөг байна. Хэрэв өрхүүдийн зардлыг бүсээр нь ялгаж харвал орон нутгийн иргэдийн зарлага нийслэлчүүдийнхээс 21.3 хувиар бага. Улаанбаатарын өрхүүд сард дунджаар 1.2 сая төгрөг хэрэглээндээ зарцуулдаг бол орон нутгийн өрхүүдийнх 980.6 мянган төгрөгт хүрсэн. Улаанбаатарт 300 мянган төгрөгөөс бага зарлагатай өрх дөнгөж 4.4 хувийг эзэлж байгаа бол хөдөөд энэ үзүүлэлт 15.8 хувьтай байна. Харин сард 900 мянгаас дээш төгрөг хэрэгцээндээ зарцуулдаг өрх нийслэлд 51.1 хувь, хөдөөд 31.7 хувийг эзэлжээ.

Эх сурвалж: ЗАСГИЙН ГАЗРЫН МЭДЭЭ

3 сэтгэгдэл

News.mn сайтад сэтгэгдэл оруулахад анхаарах зүйлс

Avatar

300,000-с бага зарлагатай өрх 4,4% 2018-03-06

Энэ нь Монголчуудын амьжиргааны өртөг өссөнийг харуулж байна. Гэтэл Улсаас Хүн амын амьжиргааны доод түвшинг 240,000 төгрөг гэж тогтоосон нь арайл хатуу байна. Уг нь энэ тоог 400,000 орчим болгоод хүний амьжиргааны доод төвшний орлогоос татвар суутган авахгүй байвал хүмүүсийн амьжиргаа ч сайжирна. Аж ахуйн нэгжүүд ч хүмүүсийнхээ цалин мөнгийг нэмэхэд дөхөмтэй байх. Амьжиргаандаа яагаад ч хүрэхгүй цалин аваад түүнээсээ татвар суутгуулахаар хүмүүст улстаа өгч байгаа гэсэн гэгээлэг сэтгэлгээ огт төрдөггүйн дээр байгууллагынхаа нягтланг цалингаас суутгаад авчихлаа гээд байнга хараадаг.

Avatar

Зочин 2018-03-06 202.21.117.230

hezee ch guitsej bgaagui eee

Avatar

Одбаяр 2018-03-06 180.149.78.99

Эдийн засаг сэргэх хандлага ажиглагдахгүй байна. 2014 онд америк доллар 1300-1400 төг, вон 1 төг байсан. Гэвч эдийн засгийн буруу бодлого, засаглалын тогтворгүй байдал, алдаатай тооцоолол, шийдвэрүүдээс болж, одоогийн түвшинд хүрлээ. Бид 1990- ээд оны эхэн үеийн хүнд хэцүү үеийг санагдуулам нөхцөл байдалд орчихлоо. Өлсгөлөн, гуйланчлал, архидалт, хулгай, дээрэм, биеэ үнэлэлт нийгэм доройтоход илэрдэг бүхий л муу, муухай зүйлс сэргэж, хүчээ авч байгаа мэт……………
Монгол хүн хөдөлмөрөө үнэлүүлж чадахгүй байгаа болохоор харийн оронд боолчлогдож хэдэн ногоон цуглуулж Монголруугаа, гэр бүлдээ явуулахын тулд залуу халуун нас, эрүүл мэндээ золиослон байж зүтгэж байна. Монгол хүн тал шигээ уудам сэтгэлтэй, тэнгэр шигээ цэлмэг ухаантай болохоороо л болгоод амьдарч байна даа. Монгол улс сэргэж сэхэх, Монголчууд сайхан амьдрах цаг ирэх бизээ. Монгол улсын хэмжээнд цалингийн доод түвшинг 1000 америк долларт хүргэж чадвал бид саруул сайхан орондоо санаа амар, сэтгэл итгэл дүүрэн ажиллаж, амьдарна. Гарц шийдлийг нь хамтдаа хайцгаая залуусаа………

NewsMN Гар утасны хувилбар Татах
NEWS.mn

Мэдээллийн эх сурвалж